Лаешның 2 нче мәктәбенә керү юлын этләр саклый

Кичә кечкенә сыйныф укучыларына, зуррак яшьтәге балаларга да Лаешның 2 нче мәктәбенә дәресләргә вакытында эләгү проблемалы булды. Бинага керү юлын җиде эттән торган көтү "саклый" иде. Усалланып ырлап, алар беркемгә дә үтәргә ирек бирмәделәр, аларны әйләнеп үтәргә туры килде. Никтер хуҗасыз этләр белән проблема һаман хәл ителми, ә алар бит тешлиләр дә, котыру һәм башка куркыныч авырулар да йоктыралар. Балалар һәм өлкәннәр иминлеген җитди кайгыртырга вакыт. Хәзергә әле "безнең кече туганнарыбыз" үзләрен урам хуҗалары итеп хис итәләр.