Безнең тату гаилә

Узган атнада Лаешның 2 нче мәктәбе беренче сыйныфында "Гаилә бәйрәме" үтте. Аның оештыручысы - әлеге татар сыйныфының класс җитәкчесе Гөлнур Хуҗәхмәтова. Ул үз сыйныфларының бер зур һәм тату гаилә булуын, аңа балалар гына түгел, ә әти-әниләр дә керүен күрсәтергә теләгән.

Гөлнур Мансуровна әти-әниләргә, туган җиргә һәм туган илгә мәхәббәт һәм хөрмәт тәрбияләүче шигырьләр һәм җырлар сайлаган. Бәйрәмдә балалар түгәрәк җитәкчеләре Роза Фатыйхова куйган музыкага ияреп "Капкалы", "Чума үрдәк, чума каз", "Йөзек салыш", "Парлы уен" кебек халык уеннары уйнадылар, һәркемгә якын татар җырлары җырладылар. Бу укучыларга үзләренә якын һәм аңлаешлы телдә халкыбызның үткәне белән танышу мөмкинлеге бирде.

Әти-әниләр дә читтә калмады. Алар бишек җырлары җырладылар, курчаклар биләделәр, кечкенә бала карау күнекмәләрен искә төшерделәр. Балалар әти-әниләренә горурланып карап тордылар, алар өчен җан аттылар һәм алкышлар белән аларга көч бирделәр.

Мәктәп директоры Анна Аптралова класс җитәкчесенә, укучыларга һәм вожатыйлар-сигезенче сыйныф укучыларына кызыклы чара өчен, ә әти-әниләргә хуплаулары өчен рәхмәт белдерде. Милли белем бирү мәсьәләләре буенча директор урынбасары Зөлфия Газизуллина мондый чараларның балалар тәрбияләүдәге әһәмиятен билгеләп үтте. Ул балаларның лаеклы кешеләр булып үсүләрен һәм һәрчак ата-аналарын сөендереп яшәүләрен теләде. Бәйрәмне чәй табыны артында дәвам иттеләр, анда әти-әниләр әңгәмә корды һәм киләчәккә планнар турында фикер алышты.

Татар сыйныфының класс җитәкчесе укучыларда рухи һәм милли мираска хөрмәт тәрбияли.