“Липки“ лагеренда беренче сабантуй
Быел июль артык эссе булмады, әмма бу Лаешның "Липки" балалар лагерена кагылмый. Балаларның һәр көне кызыклы шөгыльләр - спорт, уеннар, төрле конкурслар белән тулган. Чараларны әзерләүдә балалар үзләре катнаша һәм, иң мөһиме, яңа танышлар булдырырга, җаваплы һәм мөстәкыйль булырга өйрәнә. Һәр смена Яңа ел, "Липки" миссы һәм мистеры һәм җәйнең...
Быел июль артык эссе булмады, әмма бу Лаешның "Липки" балалар лагерена кагылмый. Балаларның һәр көне кызыклы шөгыльләр - спорт, уеннар, төрле конкурслар белән тулган. Чараларны әзерләүдә балалар үзләре катнаша һәм, иң мөһиме, яңа танышлар булдырырга, җаваплы һәм мөстәкыйль булырга өйрәнә.
Һәр смена Яңа ел, "Липки" миссы һәм мистеры һәм җәйнең төп бәйрәме - Сабантуй кебек күп вакыйгалар белән истә калыр.
Сабантуйны билгеләп үтү гадәте лагерьда күптән бар, әмма быел ул аеруча масштаблы булды. Балалар һәм вожатыйлар футбол мәйданын төрле төстәге флагчыклар белән бизәделәр, кирәкле спорт инвентаре урнаштырдылар. Берьюлы берничә уен мәйданчыгы ясадылар - мәсәлән, капчык белән сугышу һәм су тулы чиләкләр белән йөгерү өчен. Янәшәдә сөттән акча эзләү ярышы оештырдылар һәм күзне бәйләп мөмкин булганча күбрәк әйберләр табарга тырышу мөмкин булган алан ясадылар. Ә кемдер үз көчен армрестлингта һәм турникта күтәрелүдә сынап карады.
Һәр катнашучы истәлекле бүләк алды, ә иң активлар - берне генә дә түгел. Конкурсларда катнашу иң кечкенәләргә дә, олырак яшьтәге балаларга да ошады.
Һәм, әлбәттә, Сабантуй батырын - гадәттәге көрәштә җиңүчене билгеләделәр. Сүз уңаеннан, көрәш барлык кагыйдәләр буенча, чын сөлгеләр, судьялар, медальләр белән үтте һәм бәйрәмнең иң югары ноктасына әйләнде.
Лагерьның беренче батыры булып балачактан җәйләрен "Липки"да үткәрүче Станислав Шиһапов калды. Җиңүче кыйммәтле зур бүләк алды, аннан соң дуслары аны кулларына күтәреп, берничә тапкыр күккә чөйделәр.
Кичен бөтен лагерь балалар һәм вожатыйлар белән бергә әзерләнгән концертка җыелды.
-Гореф-гадәтләрне саклау һәм яшь буынга тапшыру бик мөһим, - дип билгеләп үтә лагерьның өлкән вожатые Марина Шастина. - Моннан тыш, бәйрәмнәр коллективны берләштерергә һәм оялчанлыкны җиңәргә ярдәм итә. Гадәттә чараларда катнашудан тартынган балалар да бүген ярышларга актив кушылдылар.
Чыннан да, күңелле уеннарда бар лагерь катнашты - уналты яшьлек егетләр һәм кызлар да, алты яшьлек бәләкәчләр дә. "Липки"дагы сабынтуй аннан ерак түгел яшәгән балаларны да җәлеп итте. Алар да әлеге бәйрәмдә теләп алган кунаклар булдылар.
"Липки"да Сабантуй шулай кызыклы һәм матур үтте. Смена дәвамында актив булган балаларга истәлеккә лагерь эмблемасы төшкән футболкалар бирделәр.
Бу бәйрәм үзенчәлекле булды. Әмма алда - яңа смена, димәк, яңа хис-кичерешләр.
