Без үз тәрбиячеләребезгә рәхмәтле

Лаеш балалар йорты юбилее уңаеннан тантаналы сүзләр туктады, анда тәрбияләнүчеләр үз шәһәрләренә һәм авылларына таралдылар. Ә хәтер аларны кат-кат үз бала чакларына кайтарган кичне искә төшерә, ул чакта истәлекләрдән барысына күңелле дә, моңсу да булды.

Күптән түгел, 22 августта, балалар йортыннан чыккан бар буын вәкилләре очрашты. Балалар йортының элекке тәрбияләнүчеләре күпләп җыелган бу көнне без биш ел көттек. Күпләре әти-әниләре яки әби-бабалары үскән урынны күрсәтү өчен балалары һәм оныклары белән киләләр. Монда Россиянең төрле төбәкләреннән генә түгел, ерак һәм якын чит илләрдән килүчеләрне дә күрергә булды. Барысы туган йортларын сагынган. Ул чынан да үз. Еллар узган саен моңа күбрәк инанасың. Бер генә тәрбияләнүче дә үз балаларын дәүләткә тәрбияләргә бирмәгән. Нинди генә кыен хәлгә тарысалар да үз балаларын ташламаганнар. Чөнки һәр кайсы әнисез һәм әтисез калуның нинди булуын үзе кичергән. Һәрберсе гаиләдә булу турында, әни кулы җылысын тою, ата кочагында бәхеттән елмаю хакында хыяллануларын хәтерли.

Бу кичтә истәлекләр күп булды - яхшылары да, начарлары да: үзләре ашап бетермичә зуррак балаларга калдыруларын, "Аҗаган", "Хәзинә тап" кебек массакүләм уеннарны ничек күңелле үткәрүләрен. Ә Яңа елга ничек әзерләнделәр! Бар коллектив белән кулдан пилмән ясадылар - 1000 данәдән артык! Кышын балалар йорты территориясен кардан чистарту өчен иртән иртүк торалар иде. Тәрбияләнчеләр йөкләмә-бурыч алалар: кемдер бәрәңге чистарта, кемдер идән юа, кемдер кием тегә. Бәрәңге-кишер утыйлар, төнлә терлекләр таптамасын өчен басуларны саклыйлар. Әлеге хезмәт күнекмәләре аларга тормышта кирәк булды.

Балалар йорты хезмәткәрләре коллективы балаларга ата-аналарча, яратып карады. Без ул вакытта моны аңламадык, таләпчәнлек һәм кырыслыкларына үпкәләдек. Ә еллар үтеп, үз балаларың булгач, педагогларның никадәр хаклы булуын аңлыйсың.

Балалар йорты тәрбиячеләре һәм хезмәткәрләре безнең өчен үткәргән бәйрәмнең программасы төрле иде. Алар безне ачык йөз белән каршы алдылар, бәйрәм табыны оештырдылар. Безнең төп әниебез - директор Рузалия Хәбибулла кызы Вәлиуллина һәркемне үз баласы кебек каршылады. Ул тормышының күп өлешен безгә багышлады. Бер генә буын чыгарылыш аны җылы сүз белән искә алмый.

Көн буе спорт уеннары, концерт булды, аларда элекке һәм хәзерге хезмәткәрләр һәм тәрбияләнүчеләр катнашты. Кичен волейбол һәм футбол буенча ярышлар булды.

Барысы да балачакларын һәм яшьлекләрен искә алды, үзләренең күңелләренә якын урыннарын табарга омтылып лагерь территориясе буйлап йөрделәр, ә андый урыннар һәр тәрбияләнүченеке дә бар. Кичке аштан соң чыгарылыш елына карап учаклар янына таралыштылар. Яр буенда палаткалар куелган, табыннар корылган, учаклар янында җырлашалар. Без бер-беребезгә кунакка йөрештек, ә төн якынлашкач Кама буенда бер зур учак яктык һәм барыбыз бергәләп салютны көттек. Йокы килми иде, күпләр таң каршыларга булды.

Озак еллар күрмәгән дусларың белән көн дә очрашып, алар өчен көн дә шатланып булмый. Гаиләдә үскән балалар әти-әниләренең ана назыннан мәхрүм булганлыкларын, таяныр җилкәләре булмавын һәм әти-әниең булуның, мәктәптән үз йортыңа кайтып, аш бүлмәсендә кайнар чәй эчүнең нинди бәхет икәнен акыллары белән дә, йөрәкләре белән дә монда гына аңлый башлаганнардыр, мөгаен.

Хәзерге тәрбияләнүчеләр җитешлектә яши һәм бу шатландыра. Балалар йортының иганәчеләре бар. Балаларны район җитәкчелеге дә игътибарсыз калдырмый.

Без, элекке тәрбияләнүчеләр, балалар йортының барлык элекке һәм хәзерге хезмәткәрләренә җылылык һәм чын күңелдән кабул итүләре өчен рәхмәтлебез.

Лаеш балалар йортының элекке тәрбияләнүчеләре исеменнән һәм алар йөкләмәсе буенча Гомәр Насыйбуллин.