Лаеш районының Травкино авылында янгында ир кеше һәлак булган

Кызыл әтәч елы котырына. Башта Лаешта йорт янды һәм аның хуҗасы һәлак булды. Аннан соң Травкинода. Иртәнге бишләр тирәсендә кечкенә авылда йорт яну турында хәбәр килә.

-Янгынны 5 сәгать 30 минутта сүндерә башлыйлар, ә 5 сәгать 41 минутта ул сүндерелә, - дип хәбәр итә Россия МЧСның Татарстан буенча идарәсе матбугат хезмәте. - Янгынның мәйданы 50 кв.м. тирәсе тәшкил итте. Аны сүндерүдә 20 кеше һәм 3 берәмлек техника катнашты.

Янгынның фаразланган сәбәбе - тәмәке тартканда ут белән сак эш итмәү.