Каравон онлайн режимда яңа мөмкинлекләр ача

Бәйрәмнең гадәти булмаган форматына карамастан, тамашачылар борынгылыкка күмелә, халык җырларын тыңлый һәм хәтта призлар да ота алдылар.

Каравонда катнашучыларга һәм тамашачыларга сәламләү сүзе белән Татарстан Республикасы мәдәният министры Ирада Әюпова мөрәҗәгать итте.

- Бу бәйрәмнең мәгънәсе халык традицияләрен саклап калу һәм аларны буыннан-буынга тапшыру, - диде Ирада Хафизҗановна. - Каравонда иң мөһиме - тамаша гына түгел, ә аның чын мәгънәсен тою мөмкинлеге дә. Шунысы куанычлы, яшьләрнең күбесе үз халкының тарихы, мәдәнияте һәм гореф-гадәтләре белән кызыксына. Фестивальне онлайн режимда уздыру - вакытлы хәл. Әмма шуны истә тотарга кирәк: бернинди кыенлыклар да, авырлыклар да күңелебезне сындырмый, гореф-гадәтләрне үтерми, тарихны яңадан язмый.

Беренче булып сәхнәдә фестиваль хуҗабикәләре - Никольскийдан шул исемдәге ансамбль чыгыш ясады. Әбиләр һәм яшь кызлар милли киемнәрдә борынгы җырлар башкардылар һәм үзенчәлекле, “Каравон” адымы белән әйлән-бәйлән уйнадылар. Алардан тыш, «Купава», «Духов день», «Верес», «Не любо – не слушай» һәм башка коллективлар чыгыш ясады. Алар аудиторияне Татарстанның төрле почмакларында җырланган һәм җырлана торган рус халык җырлары белән таныштырдылар.

Каравон белән котлауларын узган елларда катнашучылар – Надежда Бабкина һәм Марина Девятова язып җибәрделәр.

-Мин онлайн-режимның фестиваль кәефен бозмаячагына тулысынча ышанам, - дип билгеләп үтте Марина Девятова. – Узган ел коллектив белән зур күңел күтәренкелеге, ярату һәм ярдәм алуыбызны яхшы хәтерлим. Мин сезнең ничек җырлавыгызны һәм биюегезне хәтерлим. Фестиваль чәчәк атсын, ә халык җырлары һәрчак яңгырасын иде. Халык музыкасы исән чакта халык үзе дә яшәячәк.

Никольский кул эшләре осталарының осталык сәгатьләре дә кызыклы булды. Алар борынгы сарафаннар, начарлыктан саклаучы курчаклар һәм элек хатын-кызлар киеп йөргән традицион баш киемнәренең үзенчәлекләре турында сөйләделәр. Сувенирлар да уйнатылды. Сорауларга беренче булып җавап биргән өч бәхетле кеше бүләкләр алачак.

Кич белән Каравон беркадәр башкача, яшьләр рухында дәвам итте. Сәхнәгә Татарстанның заманча эшкәртүдә борынгы җырлар башкаручы популяр башкаручылары һәм төркемнәре чыкты. Концертның икенче өлешен «Зарница» ансамбле ачты, анда катнашучылар рэп-эшкәртүдә халык җырларын оста һәм оригиналь башкардылар. Искиткеч тавышка һәм «Керәшен чибәре-2016» титулына ия булган Татьяна Ефремова бик матур чыгыш ясады. Марина Карпова һәм Карина Җиһаншина бәйрәмнең чын йолдызлары булдылар, алар дуэт башкардылар. Алар артыннан сәхнәгә «Авангард» халык уен кораллары ансамбле чыкты. Концертны «Хмельная Ворга» фолк-төркеме тәмамлады. Халык җырларының рок-аранжировкадагы мотивлары тамашачыларга хәтта экраннар аша да көчле энергетика бүләк иттеләр.

Артистлар залда тамашачыларсыз чыгыш ясау күпкә катлаулырак, дип саныйлар. Алар тулы көчкә чыгыш ясадылар һәм тамашачыларга яхшы кәеф бүләк иттеләр. Һәм халык онлайн-Каравонны лаеклы бәяләде. Социаль челтәрләрдә калдырылган барлык фикерләр дә диярлек уңай булды. Һәм барысы да киләсе елга Каравон офлайн режимда, борынгы Никольский авылы урамнарында узар дип өметләнә.