Комиссия әгъзалары сайлаучылар өчен бәлеш пешерделәр

Наилә Җиһаншина фотосы.

Теләсә кайсы сайлау участогына кирәк булган мәҗбүри җиһазлардан кала, комиссия әгъзалары авылдашлары өчен сый да әзерләгәннәр.

-Авыл җирлеге башлыгы Илшат Мөбарәкшин урамга чатыр куйды. Ике борынгы самавыр кайнаттык. Без, комиссия әгъзалары, кем нәрсә булдыра шуны алып килдек, табын кордык, - дип сөйли комиссия рәисе Наилә Җиһаншина. – Бездә барысы тыныч, активлык югары – 14.30га сайлаучыларның 80%тан артыгы тавыш бирде инде. Без музыка куйдык, кешеләр рәхәтләнеп биеделәр. Чын күңелдән ял иттеләр.

Теләге булганнар фотозонада фотога төшә алдылар – бу да комиссия әгъзалары эше. Үз-үзләрен төшерделәр (сэлфи), гаиләләре, дуслары, якыннары белән төштеләр.

Лаеш район депутаты, пенсионер, авыл Советының элекке рәисе Әмин Җиһаншин Лаеш районының потенциалы зур булуга ышана.

-Соңгы5-6 елда районда җитди уңай үзгәрешләр бара, - диде Әмин Нургалиевич. – Безгә шундый кешеләр турында кайгырта торган хакимият кирәк тә.