Эльвера Абдуллина-Байгазина. Стихи ко Дню Победы

Ветераннар -бөек ветераннар
Баш иябез сезнең каршыда .
Ул дәһшәтле сугыш елларыгыз
Йөрәк түрендәдер барсы да .

Олы афәт илгә ябырылгач
Күтәрелеп илне сакларга .
Туган илне , туган туфракны
Бөек Ватаныбызны якларга .

Ил озатты газиз балаларын
Ир-атларын ,гүзәл затларын .
Яңа мыек типкән егетләрен 
Тал чыбыктай япь-яшь кызларын .

Соңгы сулышкача көрәштеләр
Салкын окопларда яттылар .
Күкрәкләре белән амбразура каплап
Җырлар булып илгә кайттылар .

Бик күпләре кайта алмадылар
Ватан өчен башын салдылар .
Онытылмас истәлекләр булып
Йөрәкләрдә уелып калдылар .

Ветераннар -олуг ветераннар
Кан тамадыр саркып ярадан .
Сирәгәя сезнең сафларыгыз
Сез китәсез безнең арадан .

Аяз булсын зәңгәр күкләребез
Туган илем кан -яшь түкмәсен .
Бу дәһшәтле сугыш юлларыннан
Тагы бер кат илем үтмәсен . 

Онытмабыз сезне ветераннар
Сез һаман да йөрәк түрендә .
Изге үрнәк безгә -ветераннар
Якты  йолдыз күңел күгендә .

Вәхшиләрчә кергән фашистларны
Һәммәсен дә себереп түктегез .
Европаны азат иттегез дә
Берлингача барып җиттегез .

Горур атлап безнең ветераннар
Кызыл мәйданнардан үттеләр .
Җиңү көнне назлы-җылы җилләр
Алар үткән юлны үптеләр .

Бөек Җиңү яулар өчен илем 
Кан-яшьләрен күпме түктеләр .
Җаннарында яшь аралаш шатлык
Ветераннар горур үттеләр .