Габишевоның Лиллихаммерга җавабы

Норвегиянең Лиллихаммер шәһәрендә яшьләр кышкы спартакиадасы үткәрелгән көннәрдә Габишевода боз корты ачылу бик символик булды.

Хоккей мәйданчыгы һәм тимераякта йөгерү спорты белән шөгыльләнү өчен юллар ачылу Габишевоның үзенең дә, якын-тирә авыллар Рождествено, Никольский кешеләре өчен дә чын бәйрәмгә әверелде. Бу шатлыклы көнне күптән көттеләр. Хоккей кортын Габишево авыл җирлеге советының отчет сессиясенә кадәр үк сатып алганнар. Яңа спорт корылмасын урнаштыру урынын сайлау буенча шикләр була. Сессиядә район башлыгы Михаил Афанасьев инициативага старт бирде һәм кирәкле җайланмалар һәм спорт инвентаре сатып алырга ярдәм итәргә ышандырды. Боз кыры мәдәни-спорт үзәгеннән ерак түгел урнашкан һәм беренче көннән үк зур бәйрәм аренасына әйләнде. Әлеге тантана истә калырлык булсын өчен мәдәният хезмәткәрләре коллективы, укытучылар һәм яшьләр, спортчылар һәм аларның тренерлары чын күңелдән тырыштылар. Моның өстенә, спорт бәйрәме Гашыйклар көненә туры килде. Күпләр шугалакка гаиләләре белән килгән. Балалар өчен "Күңелле стартлар" оештырылды. Тамашачылар яшь фигуристларның күрсәтмә чыгышларын алкышладылар. "Лопата" һәм "Клюшка" командалары арасында иптәшләрчә хоккей матчы узды. Габишевода тимераякта йөгерү спорты буенча үз тренерлары - Тамара Рубинская барлыкка килү турында хәбәр шатлыклы булды. Спортның әлеге искиткеч төре буенча секциягә берьюлы 20 яшь кеше язылды. Боз трегында шөгыльләнүләр атнага өч тапкыр үткәреләчәк. Бәлки безнең спортчыларга кайчан да булса спорт башкалалары йөгерү юлларында республика һәм ил данын якларга туры килер.