Лаеш мөмкинлекләре чикләнгән балалар һәм яшүсмерләр өчен тернәкләндерү үзәгендә «Ак таяк» көнен билгеләп үттеләр

Чара барышында тәрбияче күзләрен бәйләгән балаларга әйләнә-тирәдәге чынбарлыкны тоярга: предметларны белергә, каршылыклы бинаны узарга, тавышларыннан кем һәм кайда икәнен белергә тәкъдим итте.

Халыкара «Ак таяк» көне — ул бәйрәм түгел, бу үзенчәлекле бәла билгесе, ул җәмгыятькә янәшәдә физик мөмкинлекләре чикләнгән кешеләр яшәвен, аларга ярдәм итү һәм теләктәшлек турында искә төшерә.

Дәрес ахырында балалар күрү сәләте бозылган талантлы кешеләр турында видеороликлар карадылар һәм Диана Гурцкая башкаруындагы «Хыял» җырын тыңладылар.

— Мондый чаралар балаларга сукыр һәм начар күрүче кешеләрнең проблемаларын аңларга һәм бераз тоярга ярдәм итә, — дип уртаклашты социаль педагог Татьяна Сәгыйтова. — Без тәрбияләнүчеләребездә аларга карата толерант мөнәсәбәт формалаштырырга тырышабыз.