Лаешлылар Әфганстанда һәлак булган якташларын искә алдылар

Елена Запольскихның Фотосы

Митинг кайтмаганнар истәлегенә багышланган «Кара тюльпан» акциясе белән ачылды. Сугышчы-интернационалистлар һәйкәленә кара тюльпаннарны район җитәкчеләре һәм Әфган сугышы ветераннары салды.

— Әфганстанда һәлак булганнарны искә алу һәм хәрби бурычларын лаеклы үтәгән кешеләргә хөрмәт күрсәтү өчен җыелдык, — дип мөрәҗәгать итте Лаеш районы башлыгы урынбасары Татьяна Борһанова. — Сез кыюлык һәм фидакарьлек күрсәттегез. Сезнең тугрылыгыгыз һәм батырлыгыгыз тарихта Ватанга карата чын мәхәббәт һәм антка тугрылык үрнәге булып калачак.

Татьяна Петровна искә төшергәнчә, Лаеш районыннан 133 солдат һәм офицер Әфган сугышын узган. Хәзерге вакытта районда бу илдә сугыш хәрәкәтләрендә катнашкан 84 кеше яши. Күрсәткән батырлыклары өчен 18 сугышчы-интернационалист хөкүмәт бүләкләре белән бүләкләнә: 11 кеше медальләр, җиде орден, шул исәптән икесе үлгәннән соң.

Митингта үз гомерләре бәрабәренә ерак илдә җиңү яулаган кешеләрнең исемнәрен искә төшерделәр: Кузнецов Сергей Михайлович, Вәлиев Тәлгать Фәргат улы, Вафин Дамир Миңнулла улы, Билалов Илфар Низам улы, Кургузкин Владимир Александрович, Варламов Николай Иванович. Һәлак булганнар истәлегенә бер минут тынлык игълан ителде.

— Әфганстаннан гаскәрләрне чыгару еллыгы илебез өчен иң җитди сынау вакытында уза, — дип искәртте Татьяна Борһанова.

— Бүген махсус хәрби операция барышында безнең егетләр лаеклы хезмәт башкара. Аларга көч һәм сәламәтлек юлдаш булсын. Без аларны өйдә көтәбез. Барыгызга да тынычлык, игелек, иминлек, уңышлар телим.

Сугышчан иптәшләрен Лаеш районы локаль сугышлар һәм конфликтлар ветераннары советы рәисе Сергей Косарев тәбрикләде.

Сугышчы-интернационалистлар һәйкәленә чәчәкләрне Әфган сугышы ветераннары, район җитәкчеләре, яшь армиячеләр, руханилар, мәктәп укучылары һәм студентлар салды. Бу вакыйгалардан безне күп вакыт аерып тора, әмма сугыш турындагы истәлек һаман да йөрәкләребездә авырту белән чагыла.