Үз Ватаныгызның лаеклы уллары булыгыз

Советлар Союзы Герое А.П.Малышев исемендәге Столбище мәктәбе укучылары «Юнармия» хәрби-патриотик хәрәкәт сафларын тулыландырдылар.

Тантаналы чарага Татарстан Республикасының «Юнармия» төбәк хәрби-патриотик хәрәкәте штабы начальнигы генерал-майор Александр Бородин һәм Лаеш районы Юнармия штабы начальнигы Владимир Чуприн чакырылган иде.

Тантананы мәктәп ишегалдында плацта 7 «К» сыйныфы барабанчылары ачып җибәрде. Өстәмә белем бирү педагогы Иван Тоневский генералга кадетларның тантана өчен тезелүе турында хәбәр итте. Преображенский полкы маршы астында байрак төркеме Россия, Татарстан һәм Юнармия флагларын чыгарды. Россия Федерациясе һәм Татарстан Республикасы дәүләт гимннары яңгырады.

Тантананы мәктәп директоры Ирина Романова ачты.

-Яшь армиячеләр сафына Җиңү көне алдыннан кабул ителү бик символик, - диде Ирина Юрьевна. – Яшь армияче исемен лаеклы йөртүегезне телим. Ул бик кыйммәт тора, чөнки Яшь армиягә иң яхшы уллар һәм кызлар керә. Сез - безнең мәктәп, безнең район, республикабыз, илебез йөзе.

«Юнармия» бөтенроссия хәрби-патриотик иҗтимагый хәрәкәте үз эшен биш ел элек башлап җибәрде. Бу вакыт эчендә аның сафларын 31 меңнән артык яшь татарстанлы тулыландырды. Ә узган ел нәтиҗәләре буенча Татарстан Юнармия бүлеге Россиядә иң яхшысы дип табылды.

-Яшь армиячеләрнең максаты - сугыш вакытында Ватанны саклау гына түгел, ә гражданлык җәмгыятендә Ватан хакына хезмәт итү дә, - дип билгеләп үтте Александр Бородин. - Яшьтәшләрегез өчен иң яхшы үрнәк булыгыз: яхшы укыгыз, физик яктан үсегез, башлангыч хәрби әзерлек белән шөгыльләнегез. Яшь армияче үз Ватанының чын патриоты булырга тиеш, ул үз исеме белән горурлана, өлкәннәрне хөрмәт итә, иптәшләренә ярдәм итә һәм Россия гаскәрләренең данлы традицияләрен дәвам итә.

Александр Ильич Ирина Романовага Столбище мәктәбенең яшь армия отрядына Советлар Союзы Герое Алексей Малышев исемен бирү турында таныклык тапшырды.

Яшь армияченең антын Альберт Садыйков укыды. Ул үз мәктәбе кадетлары исеменнән Ватанга тугрылыклы булырга, Юнармия уставын үтәргә, зәгыйфьләрне яклаучы булырга, укуда һәм спортта җиңүләргә омтылырга, Ватан хакына хезмәт итәргә һәм иҗат итәргә әзерләнергә һәм Россия Федерациясенең лаеклы гражданы булырга ант итте.

Яшь армиячеләр сафына бишенче сыйныфтан сигезенче сыйныфка кадәр кадетлар керде. «Юнармия» Бөтенроссия хәрби-патриотик хәрәкәтенә карау билгеләрен Александр Бородин, Ирина Романова, Владимир Чуприн һәм Иван Тоневский тапшырдылар.

Чара фотосессия белән тәмамланды, аннан соң балалар мәктәптә дәресләргә кире кайттылар.