Ни өчен полициягә эшкә баралар

Бу хакта без эчке хезмәт подполковнигы Антон Голубев белән сөйләшәбез.

- Антон Сергеевич, Сез ничек уйлыйсыз, ни өчен кешеләр полициядә эшләргә хәл итә? Полиция хезмәткәрләренең эш көне нормага салынмаган, куркыныч эш бит.

- Сез хаклы. Полиция хезмәткәрләренең эш көннәре киеренке. Кайчакта яллар турында да онытырга туры килә. Ә бәйрәм көннәре – иң катлаулысы. Полиция хезмәткәрләренә җәмгыятьнең бик яхшы булмаган өлеше белән элемтәгә керергә, шикаятьләргә тиз арада җавап бирергә, гомуми белем бирү учреждениеләрендә әңгәмәләр үткәрергә туры килә. Кыскасы, эш төрле планлы. Ә ни өчен хезмәт карьерасын ЭЭБ белән бәйләргә хыялланалар? Мөгаен, изге миссияне башкарган өчендер – алар гражданнарның тынычлыгын һәм аларның тормышын саклыйлар, кайчакта үз гомерләрен куркыныч астына куялар.

- Полиция хезмәте тагын нәрсә белән җәлеп итә?

- Моннан башлыйк, бу хөрмәткә ия һөнәр, полицейский дәүләт хезмәткәрләре булып тора. Моннан тыш, кайбер ташламалар каралган. Полиция хезмәткәре түләүсез дәвалану үтә, санатор-курорт дәвалавы буенча ташламаларга ия. Бушлай югары белем алу мөмкинлеге бар. Полиция хезмәткәрләренә торак шартларын яхшырту һәм сатып алу өчен бер тапкыр бирелә торган түләү, шулай ук торак бинаны наемга алган өчен компенсация бирелә. Карьера үсеше мөмкинлеген һәм тиешле еллар эшләгәннән соң пенсиягә хокук алу мөмкинлеген дә билгеләп үтәргә кирәк (армиядә һәм Россиянең башка структураларында хезмәт итү кертелә торган 20 ел хезмәт итү, шулай ук югары һәм урта махсус белем бирү программалары буенча көндезге уку срогының яртысы). Пенсиягә чыккач, хокук саклау органнарының күп кенә хезмәткәрләре башка өлкәләрдә эшләрен дәвам итәләр, хезмәт хакы да, яхшы гына пенсия дә алалар.

- Кандидатлар нинди дә булса сайлап алуны узамы?

-Әлбәттә. Бар кеше дә полиция хезмәткәре формасын кия алмый. Моның өчен билгеле бер шәхси сыйфатларга ия булырга кирәк: хис-тойгыларны контрольдә тота белергә, ачык, акыллы, җаваплы, физик яктан нык, аралашучан булырга һәм кайчакта кыюлык күрсәтергә кирәк. Чыдамлык, хезмәт сөючәнлек, намуслылык, үткенлек, альтруизм – бу сыйфатлардан башка полициягә барырга кирәкми. Югары яшь бусагасы 40 яшьне тәшкил итә. Ир-атлар өчен РФ Кораллы көчләрендә хезмәт иткән булу мәҗбүри. Мөһим таләп - хөкем ителмәгәнлек, наркотик һәм алкогольгә бәйлелек, хроник авырулар булмау.

Шуны истә тотарга кирәк, һәр көн җинаятьчеләр артыннан куу түгел - кайвакыт эш монотонлы була. Шуңа күрә полициядә хезмәт итү турында карар уйланылган булырга тиеш.