Ел башыннан республикада коллекторлар эшенә 700дән артык татарстанлы зарланды

Агымдагы ел башыннан безгә коллекторларның эшенә карата шикаятьләр белән 771 мөрәҗәгать килде. Бу хакта «Татар-информ» да узган матбугат конференциясендә дәүләт реестрын алып бару һәм бурычларын кайтару функциясен башкаручы юридик затларның эшчәнлеген контрольдә тоту бүлеге башлыгы Дмитрий Богумель сөйләде.

«Еш кына телефон шалтыратулар саны, текст, тавыш, шулай ук видео һәм фото хәбәрләре саны арту турында мөрәҗәгать итәләр. Мөрәҗәгать итүчеләр психологик басым ясаудан, бурычлыларның яшәү урыны буенча килү белән янаулардан, өченче затларны җәлеп итү турында хәбәр итмәүләрдән, судка һәм хокук саклау органнарына мөрәҗәгать итү нияте турында зарланалар. Бурычлылар белән аралашуның барлык бу ысуллары тыелган һәм гамәлдәге законнарны бозу булып тора», — диде ул.

Аның сүзләренчә, хәзер коллекторлар һәм микрокредит оешмалары бурычлы кешенең туганнары һәм танышлары, ягъни өченче затлар белән элемтәгә керә башлый.

«Кеше микрокредит оешмасының кушымтасын йөкләгәч, ул аларга үз телефонындагы элемтәләргә керү мөмкинлеген бирә. Намуссыз оешмалар бурычлы кешенең туганнары һәм хезмәттәшләре белән элемтәгә керә башлыйлар, шуның белән законны бозалар», — диде ул.