Митрополит Кирилл Троицк чиркәвенә килде

Казан һәм Татарстан митрополиты Кирилл Лаеш шәһәрендәге Свято-Троицк архиерей утарында илаһи литургия үткәрде.
Митрополитны район башкарма комитеты җитәкчесе Азат Нурмөхәммәтов, Лаеш шәһәре башкарма комитеты җитәкчесе Виктор Арефьев, Свято-Троицк архиерей утары рухание иерей Марк Александров, Николай Чудотворец соборы рухание иерей Сергий Гришин һәм башкалар каршы алды.
Хезмәт Марина Литвиненко җитәкчелегендәге архиерей катнаш хоры башкаруында җыр җырлаулары белән озатылды. Россия гаскәрләре һәм тынычлык турында догалар укылды. Вәгазьне иерей Роман Исаев сөйләде. Ахырда Раштуа бәйрәмен данлау булды.
— Барыгызны да Раштуаның искиткеч, юатучы һәм бик җылы бәйрәме белән котлыйм, — дип мөрәҗәгать итте дин тотучыларга митрополит Кирилл. — Салкын һава торышына карамастан, йөрәгебез җылы, чөнки Гайсә пәйгамбәр безнең һәрберебезне коткарыр өчен туган. Барыбызга да Аллаһ белән бергә яшәвебезне, Аллаһ белән бергә иҗат итүебезне, гаиләбезне һәм якыннарыбызны яратуыбызны, балаларыбызны, оныкларыбызны һәм оныкчыкларыбызны тәрбияләвебезне һәм Ватаныбызны яратуыбызны телим. Туган илебезне яратыйк һәм кызганыйк, аны коткару өчен дога кылыйк, чөнки бүген безнең якыннарыбыз аның өчен сугыш кырларында кан түгәләр. Һәм без көн саен дога кылабыз, алар исән-сау өйләренә кайтачаклар дип өметләнәбез. Аллаһ аларны һәм безнең Ватаныбызны тынычлыкта һәм иминлектә сакласын! Якшәмбе мәктәбендә тәрбияләнүчеләр Раштуа бәйрәменә багышланган шигырьләр укыдылар һәм ясаган бүләкләрен архиерей Кириллга тапшырдылар. Гыйбадәт кылуда катнашучыларга бәйрәм открыткалары, балаларга шоколадлар бүләк иттеләр. Архиерей хоры Раштуа колядкаларын башкарды.
Митрополит мәхәллә кешеләренең Троицк утары турында кайгыртуына игътибар итте һәм Свято Троицк чиркәвен торгызуда һәм матурлауда уңышларын уңай билгеләп үтте.