Теләге булганнарга — чиста су

Эчә торган яңа чиста су чыганагы шәһәр мәчете янәшәсендә ачылды.

Чишмәне тантаналы ачу мәчеттә җомга намазы укылгач булды. Аны ачуга Лаеш район башлыгы Илдус Зарипов, Казанның Әл-Мәрҗәни мәчете имам-хатыйбы Мансур хәзрәт Җәләлетдин, Лаеш районы имам-мөхтәсибе Наил хәзрәт Әбелханов, социаль тернәкләндерү һәм җайлаштыру үзәге директоры Азат Гайнетдинов һәм башка кунаклар чакырылган иде.

-Бүген районда 13енче һәм Лаешта беренче чишмә ачыла. Ул бар кеше өчен, нинди милләттән һәм нинди диндә булуга карамастан барыбызга, рәхим итегез. Мондый биналар — әйләнә-тирәдәгеләр өчен зур ярдәм, чөнки һәр кеше суга мохтаҗ. Су булган җирдә тормыш та була, — диде ачу тантанасында Наил хәзрәт.

Бүләкләү тантанасында төзелештә һәм Лаеш районы социаль проектларында катнашучыларның барысы хөрмәтләнде.

-Бу яхшы проект һәм республикада бердәнбер. Зур эш башкарылган: скважина борауланган, су табылган, аны фильтрлыйлар, алып эч кенә. Бу безнең меценатлар ярдәмендә тормышка ашырыла торган проектларның берсе. Алар аны чын күңелдән эшлиләр. Киләчәктә дә эшләрендә уңышлар юлдаш булсын, — дип билгеләп үтте Илдус Фатыйх улы.

Азат Гайнетдинов Лаеш районының «Родной край — Туган як» якташлар берлеге ярдәмендә тормышка ашырыла торган башка социаль проектлар турында да сөйләде. «Приют человека», М-12 трассасында ике иман бүлмәсе һәм берничә яңа чишмә ачылган. Янгыннан зыян күрүчеләргә йорт салу дәвам итә. Киләсе елга планнар арасында — яңа мәчет янында чишмә төзү.

-Лаеш районы — бу бар республика өчен үрнәк, — диде Мансур хәзрәт. — Монда мәчетләр төзелгән, мәдрәсә эшли. Ә хәзер чиста су чыганаклары ачыла.

Аннан соң теләге булганнарның барысы чиста судан авыз иттеләр, аның тәменә һәм йомшаклыгына бәя бирделәр.