Халыкта талантлар бетмәгән әле

Сокуры авылы мәдәният йортында "Татарстан - безнең йортыбыз" республика этномәдәни фестиваленең район этабы узды.

Әлеге чараның максаты - ТР халыклары бердәмлеген ныгыту, шулай ук республиканың күпмилләтле мәдәниятен саклау һәм үстерү. Конкурска иҗат коллективлары һәм башкаручылар Лаеш районының 17 авылыннан килде. Сокуры кешеләре бәйрәмнән читтә калмады: актлар залы халык сәнгатенә якынаерга теләүчеләр белән тулы иде диярлек.

Жюрида мәдәният һәм сәнгать өлкәсенең чын профессионаллары утырды. Алар арасында ТРның халык артисты, "Сәйдәш" бию театрының сәнгать җитәкчесе Таһир Латыйфуллин, керәшеннәрнең "Бәрмәнчек" Дәүләт фольклор ансамбленең баш хормейстеры, артист-вокалисты Эльвира Камалова, Лаеш районы мәдәният бүлеге начальнигы Илнур Гайниев һәм башкалар бар.

Өч сәгать дәвамында сәхнәгә төрле жанр артистлары чыкты. 25 Октябрь исемендәге поселоктан яшь башкаручылар рус халык биюләре белән шатландырдылар. Урта Девятоводан Владимир Курмышкин дәртләнеп балалайкада уйнады һәм такмаклар белән чуаш халык җырлары җырлады. Чирпыдан Нина Барыгина-Левандовская илһамланып "Любимый Татарстан" шигырен сөйләде. Жюри хөкеменә барлыгы 30 дан артык сәнгать номеры тәкъдим ителде.

Судьялар катнашучылар чыгышын югары бәяләделәр һәм үз талантларын үстерүләрен теләделәр.

-Бәлки техник яктан барысы да идеаль төстә башкарылмагандыр, яки барысының да концерт костюмнары булмагандыр, әмма кешеләр ихлас күңелдән, чын йөрәктән чыгыш ясадылар. Ә бу барыннан да мөһимрәк, - дип билгеләде Таһир Латыйфуллин.

-Конкурсантлар чыгышыннан Лаеш районы авыл клубларының эшләгәне күренеп тора, - диде Илнур Гайниев. - Үз чиратында, мәдәният бүлеге хезмәткәрләре теләге булган һәркем яраткан эше белән шөгыльләнә алсын өчен көч куярлар.

Район турында җиңүчеләр "Татарстан - безнең йортыбыз" этномәдәни фестиваленең республика этабында катнашачаклар. Ул 12 октябрьдә Казанда Халыклар дуслыгы йортында булачак.