Беренче директор турында хатирәләр

80нче еллар уртасында безнең гаилә Балык Бистәсенең ерак бер авылыннан Казанга якынрак күчәргә уйлады. Валентин Евлампиевичка ике вариант тәкъдим итәләр: Никольскийда төзелеп беткән мәктәп яки Лаешта – төзелүче. Гаилә белән киңәшләшеп ул яңа төзелешкә җитәкчелек итәргә уйлый һәм 25 ел дәвамында мәктәпнең алыштыргысыз директоры була. Бу аның теләге, сабые һәм тормыш мәгънәсе. Хәзер, әти безнең арада булмаганга ун ел узгач та, аны кешеләр һаман да яхшы сүз белән искә алалар һәм мин аңлыйм, ул гомерен юкка үткәрмәгән.

Күптән түгел Рәисә Абдулловна Хәбибуллина белән һава торышы һәм укучылар турында гади әңгәмә акрынлап бу мәктәпнең ничек төзелүе һәм ачылуы турында хатирәләргә күчте. Ул вакытта минем әңгәмәдәшем Лаеш КПСС райкомының идеология буенча секретаре булып эшләде һәм бу тарихта бик актив катнашты. Ул бу вакытта Лаешта бер генә мәктәп эшләвен искә төшерде. Өч сменада диярлек укыйлар, дәресләр бик соң тәмамлана. Шул чакта партия райкомы яңа мәктәп төзергә дигән карар кабул итә. Хәзер Лаешның 2нче мәктәбе урнашкан территориядә сыер абзарлары иде. Аларны сүтеп, алар урынында яңа уку йорты төзергә булалар. Урынны очраклы сайламыйлар: Лаешның бу өлешендәге балаларга мәктәпкә йөрергә ерак булмасын өчен.

1984 елның февралендә, инде бизәү эшләре барганда, директор эзли башлыйлар. Барысы да аңлый: яхшы хуҗалыкчы һәм инициативалы җитәкче кирәк. Директор алдында торган бурычлар гади булмый: уку процессын оештыру өчен парталар, урындыклар, такталар, җиһазлар һәм күп кенә башка нәрсәләр таләп ителә. Параллель рәвештә төзелеш эшләре дәвам итте. Ә тагын коллективны җыярга кирәк иде. Чөнки мәктәп - стеналар гына түгел. Бу, барыннан да элек, укытучылар. Укучыларның анда үзләрен ничек хис итүе нәкъ менә шуңа бәйле.

Һәм шул чакта Лаеш районы мәгариф бүлеге мөдире Насыйров Ильяс Хаҗиәхмәт улы Валентин Евлампиевич кандидатурасын тәкъдим итте. Алар Балык Бистәсендә эшләгән вакыттан таныш иде. РОНО мөдире аны тәҗрибәле профессионал һәм яхшы кеше буларак белә. Беренче көннәрдән үк мәктәпне комплектлау буенча авыр йөк яңа директор җилкәсенә төште, һәм ул үз бурычын бик яхшы үти алды. 1984 елның 1 сентябрендә йөзләгән малай һәм кыз яңа мәктәптә парта артына утырдылар.

Хәзер, 35 ел узгач, укытучыларның бер генә буыны алышынмады, бинаның йөзе үзгәрде, ә Лаешның 2 нче урта мәктәбе шулай ук үз укучылары өчен ишекләрен ача. Ул элеккегечә үк традицияләре белән көчле һәм укучылары белән дан тота. Бу аның беренче директоры Иванов Валентин Евлампиевич турында иң яхшы хәтер.