Районга Киров өлкәсеннән делегация килде

Казанда Татарстан һәм Киров өлкәсе арасында муниципальара хезмәттәшлек һәм үзара мөнәсәбәтләр турында Килешүгә кул куелды. Дустанә делегациянең Лаеш районына эш сәфәре Комлы Ковалидан башланды. Кунакларны «Дуслык» спорт-ял итү үзәгендә ипи-тоз һәм чәк-чәк белән каршы алдылар, анда спорт, тренажер һәм хореография залларын, китапханәне һәм балаларны үстерү бүлмәсен күрсәттеләр. Аннары амбулаториядә һәм «Алтын ачкыч» балалар бакчасында булдылар, аның базасында балалар һәм ата-аналар белән район чаралары, шулай ук юл хәрәкәте кагыйдәләрен үтәү буенча семинарлар үткәрелә.

Аннары делегациягә федераль һәм республика программаларын гамәлгә ашыру турында сөйләделәр һәм районның тагын берничә сәнәгать һәм социаль объектларын күрсәттеләр. Хәерби авылында «КМИЗ-Луч» АҖ заводы генераль директоры Нур Шакиров предприятиенең эшчәнлеге һәм үсеш планнары турында сөйләде. Кунаклар бер тапкыр кулланыла торган медицина инструментларын җитештерү буенча эшләүче цехларга уздылар.

Сәламәтлек саклау инфраструктурасы белән Сокуры авылында тулырак таныштылар, анда делегациягә модульле фельдшер-акушерлык пунктларын төзү буенча Татарстан тәҗрибәсе тәкъдим ителде.

Зимняя Горкада урнашкан "Биосфера-Фиш"та бөтен Идел-Вятка төбәгендә чөгә үрчетү программасын гамәлгә ашыру процессын аңлаттылар.

Эш сәфәре Лаеш шәһәрендә тәмамланды. Кунаклар «Лаеш Арена» ябык шугалагын кызыксынып карадылар, «Кама диңгезе» пляжында һәм шәһәрнең тарихи өлешендә булдылар. Киров өлкәсе вәкилләре белән бергә район җитәкчеләре һәм авыл җирлекләре башлыклары «түгәрәк өстәл» эшендә катнаштылар. Кунакларга карар һәм файдалы хезмәттәшлек копилкасына кертер нәрсәләр бар иде.