«Усады » агромаркеты ачылды

Усадта яңа сәүдә ноктасы ачылды, анда Лаеш районы аграрийларыннан экологик чиста авыл хуҗалыгы продукциясе сатылачак.

Лаеш районы Башлыгы Илдус Зарипов барлык православие динендәгеләрне Пасха белән котлады. Аннары Илдус Фатыйх улы «Усады» агромаркетының Лаеш эшкуарлары инициативасы белән ачылуын билгеләп үтте. 

— Бу безнең районда ачылган беренче объект түгел. Безнең район динамик үсештә. Торак һәм социаль объектлар төзелә, транспорт структурасы үсеш ала. Һәм, әлбәттә, янәшәдә сәүдә объектлары булырга тиеш. Бу безнең стратегиягә керә. Күргәнегезчә, Усадта күп катлы торак йортлар төзелә, янәшәдә экологик чиста продуктлар сәүдә базары ачыла. Безнең фермерлар үз продуктларын сату өчен өстәмә мөмкинлек алалар. Иң мөһиме, монда экологик чиста продукт тәкъдим ителәчәк. Мондый бүләк өчен Инсаф Вәлиевка һәм аның командасына рәхмәт. 

«Усады » агромаркеты проектын оештыручы Инсаф Вәлиев ни өчен Усадта яңа сәүдә ноктасы төзелгәнен аңлатты.

— Халык Лаеш районы фермерларыннан сыйфатлы яңа продукция сорады. Әлеге проектны без Лаеш районының «Туган як» якташлык проекты эгидасы астында башлап җибәрдек. Димәк, социаль проектлар финансланачак. Мәсәлән, мәчет территориясендә коелар төзү, балалар мәйданчыклары төзү. Якташлык мәктәпне тәмамлаучыларга һәм укытучыларга стипендияләр бирә. Быел социаль проектларга 60 миллион сумнан артык акча тотылган. Мондый объектларны алга таба да ачарбыз дип өметләнәбез. Бу агромаркеттан кешеләр сыйфатлы ризык кына алмаячак. Алар үз районнарына ярдәм итәчәк. Барыгызны да бәйрәм белән! 

Лаеш районы Имам-мөхтәсибе Наил хәзрәт Әбелханов барлык православие динендәгеләрне Пасха белән котлады. Православие динендәгеләр мөселманнарны Корбан бәйрәме, Ураза белән котлыйлар, дип билгеләп үтте. 

— Яхшылыкка җавап бирергә кирәк. Һәм без кадерле күршеләребезне якты бәйрәм — Пасха белән котлыйбыз һәм Аллаһы Тәгаләдән безгә туган җиребездә тынычлык һәм татулык бирүен сорыйбыз.
Аннары Наил хәзрәт дога укыды. Традицион ачыш тасмасы тантаналы рәвештә кисеп ташланды. Һәм менә яңа сәүдә ноктасының ишекләре киң ачылды. Төрле авыл хуҗалыгы продукциясенең күплеге гаҗәпләндерә. Биредә җиләк-җимеш, киптерелгән җиләк-җимеш, ит, диңгез продуктлары, тәмләткечләр, йомырка һәм башка бик күп сәламәт һәм яңа «хәләл» продукция сатып алырга мөмкин.