Агросәнәгать киләчәге - бүген үк

«Казан-экспо» күргәзмә үзәге территориясендә өч көн дәвамында «Агроволга-2021» Халыкара агросәнәгать күргәзмәсе узды

Элегрәк әлеге күргәзмә «Татарстанда кыр көннәре» дип атала иде һәм Татарстан авыл хуҗалыгы фәнни-тикшеренү институтының тәҗрибә кырлары территориясендә узды. Хәзер ул исемен, форматын һәм үткәрү урынын алыштырды, белгечләр өчен генә түгел, гади килүчеләр өчен дә абруйлырак һәм кызыклырак булды.

Оештыручылар хәбәр иткәнчә, «Агроволга-2021»дә Россиянең 30 төбәгеннән 304 компания, шулай ук ТРның 14 районыннан 38 хуҗалык үз продукциясен тәкъдим итте. Тәҗрибә кырларында 28 компания тәкъдим ителгән, ә 57 дилер 340 берәмлеккә якын авыл хуҗалыгы техникасы күрсәтте.

Күргәзмәдә Татарстан Республикасы Президенты Рөстәм Миңнеханов, Татарстан Республикасы Премьер-министры Алексей Песошин, Татарстан Республикасы авыл хуҗалыгы һәм азык-төлек министры Марат Җәббаров һәм Лаеш районы башлыгы Илдус Зарипов булды. Алар үсемлекләрне саклау өчен химик чаралар эшләү һәм җитештерү белән шөгыльләнүче җитештерүчеләрнең стендларын карадылар, заманча авыл хуҗалыгы техникасы үрнәкләре белән таныштылар. Аларга туфракның торышына мониторинг, продукциянең биохимия составын һәм сыйфатын бәяләү, Татарстан кырларында корткычларга һәм чүп үләннәренә диагностика үткәрү турында сөйләделәр.

Татарстан Президенты караган стендлар арасында Лаеш районы утары да бар иде. Анда «Яратель» кошчылык фабрикасы, «Биосфера-Фиш» балыкчылык комплексы, Лаеш техник-икътисад техникумы һәм районның башка предприятиеләре тәкъдим ителде. Янәшәдә генә үзләре җитештергән продукцияне тәкъдим итүче үзмәшгульләр стендлары урнашкан.

- Чараның бай эчтәлеге, эшлекле программа дәрәҗәсе буенча күргәзмә дөньяның иң эре аграр күргәзмәләре белән чагыштырырлык, - диде ачылу тантанасында Россия Федерациясе Авыл хуҗалыгы министрлыгының үсемлекчелек, механикалаштыру һәм үсемлекләрне яклау Департаменты директоры Роман Некрасов. - Һәр төбәк тә агросәнәгать комплексына мондый игътибар бирми һәм мондый чараларны оештыруга комплекслы якын килүне кулланмый.

Әмма "Агроволга-2021" бары тик тар махсуслаштырылган күргәзмә һәм агросәнәгать комплексын үстерүнең актуаль мәсьәләләре буенча фикер алышу урыны гына булмады. Гади килүчеләргә дә күңелсез булмады. Мәсәлән, Казан аграр университеты вәкилләре пилотсыз трактор күрсәттеләр. Ә нәселле терлек конкурсында иң яхшы дигән исем өчен 90нан артык сыер һәм голштин токымлы бозаулар көрәште. Күргәзмәнең иң мавыктыргыч чарасы механизаторларының «Трактор-шоу» ярышлары булды. Анда катнашучылар 100 метр озынлыктагы бер үк төрле каршылыклар булган ике параллель кисемтәдә һәм бер үк вакытта старт алып ярыштылар. Тракторчылар йөк белән фигуралы йөртү техникасын һәм тамганы мәҗбүри үтәү осталыгын күрсәттеләр. Ютазы районыннан Илдар Галиев җиңүче булды.

"Агроволга-2021" республика авыл хуҗалыгының кая баруы һәм аның киләчәктә нинди булачагы турында күзаллау бирде.