“Нармонка” агрофирмасы - авыл хуҗалыгында яңа казанышларга тест үткәрү урыны

Татарстанның авыл хуҗалыгы һәм азык-төлек министры Марат Җәббаров университетның тәҗрибә кырларында, ә аннары «Нармонка» агрофирмасында булды. Казан ДАУның тәҗрибәле басулары 100 гектар мәйданны били. Аларны хаклы төстә фәнни лаборатория дип атарга була. Бу авыл хуҗалыгы өлкәсендә фәнни тикшеренүләр уздыру өчен инновацион мәйданчык. Республика семинарында катнашучыларны аграр университетта кулланыла торган экстремаль шартларда чәчүлекләрне үстерү технологиясе белән таныштырдылар. Тема бик актуаль, бигрәк тә быелгы корылыкны исәпкә алып. Яңа сортлар һәм гибридлар үстерелә торган делянкалар тәкъдим иттеләр.

Кунакларга туфрак карталарын төзү, эшкәртү ысулларын билгеләү һәм чәчү әйләнешен проектлау ысулларын билгеләү өчен кулланыла торган туфрак сканерын күрсәттеләр. Планшет ярдәмендә механизатор ерактан идарә иткән пилотсыз трактор зур кызыксыну уятты. Галимнәр гадәти тракторга видеокамера, лидар (ераклыкны ачыклау һәм билгеләү системасы – редакция искәрмәсе) һәм идарәнең электрон блогын урнаштырганнар. Пилотсыз трактор ясау эшенә гыйнвар ахырында керешкәннәр. Хәзер аны агрофирма басуларында сыныйлар.

Аннары семинарда катнашучылар аграр университетның казанышлары белән танышуны дәвам иттеләр, ә ТР авыл хуҗалыгы һәм азык-төлек министры Марат Җәббаров һәм аның урынбасары Илдус Габдрахманов «Нармонка» агрофирмасына юл тоттылар.

Биредә аларны район башлыгы Илдус Зарипов, районның авыл хуҗалыгы һәм азык-төлек идарәсе начальнигы Виталий Германов һәм агрофирма директоры Олег Солягин каршы алды. Кунакларны техниканы урып-җыю-2021гә әзерләү кызыксындырды. Алар яшелчә басуларын, иртә өлгерүче бәрәңге уңышы ничек булуын карадылар. Бәрәңгеләрнең зурлыгы тавык йомыркасыннан зуррак инде, шуңа күрә тиздән “Нармонка” АФ иртә өлгерүче бәрәңге алуга керешәчәк. Төп акцент игенчеләрнең үсемлекчелектә эшкәртүне экстремаль һава шартларында бу катлаулы чорны ничек узуларына ясалды. ТР авыл хуҗалыгы министры комбайнчылар белән аралашты, аларның кәефе, хезмәт хакы белән кызыксынды. Тулаем алганда, Лаеш районының иң яхшы хуҗалыкларының берсендә эшләрнең торышына уңай бәя бирде.

Шунысын да билгеләп үтәргә кирәк, аграр университет белән агрофирма арасында тыгыз эшлекле мөнәсәбәтләр урнашты. Педагоглар һәм университет галимнәре аграрийларга консультацияләр бирәләр, алар белән фәнни тәҗрибә нәтиҗәләре белән уртаклашалар, урып-җыю вакытында ярдәмгә студентлар бирәләр. «Нармонка» агрофирмасы, үз чиратында, университетка авыл хуҗалыгы техникасы белән ярдәм итә.

Көн йомгаклары турында сөйләгәндә, Марат Җәббаров фәнни тикшеренүләрнең мөһим ролен билгеләп үтте:

- Кем үсемлекчелек белән җитди шөгыльләнә, кем инвестицияли, аларга табигать катаклизмнары куркыныч түгел. Алар планлаштырылган нәтиҗәләргә ирешәчәк.