Лиана Савельева ПФО беренчелегендә Татарстан данын яклаячак

Кировта тимераякта шуу спорты буенча Идел буе федераль округы (ПФО) беренчелегенең икенче этабы узды, анда комплекслы спорт мәктәбе тәрбияләнүчеләре Лиана Савельева, Салават Хәйретдинов һәм Михаил Антонов катнашты. Спортчыларның тренеры Ия Жантимирова.

Лаешның тимераякта узышучылары Киров, Түбән Новгород, Саратов өлкәләре, Пермь крае, Удмуртия Республикасы, Чувашия Республикасы вәкилләре белән көч сынашты.

Ике этапның күп көрәшләре нәтиҗәләре буенча Лиана Савельева беренчелекнең 30-31 гыйнвар көннәрендә Пермьдә узачак йомгаклау этабында катнашачак, анда Коломнада Россия беренчелегендә катнашу өчен спортчыларның соңгы составы билгеләнәчәк. Спортчыга ярышларның финал өлешендә уңышлар телибез.