Комсомол – тормыш мәктәбе

Бүгенге яшьләр комсомол турында хәтерлиме? Алар комсомолның Советлар Союзының йөзләрчә мең егете һәм кызы өчен язмышларына әйләнүен, аларның тормыш мәктәбе булуын беләме?

Барысы да еракта калган 1918 елда, эшче һәм крестьян яшьләре союзының I Бөтенроссия съездында яшь һәм актив кешеләрне берләштерәчәк оешма булдыру турында карар кабул ителүдән башлана. Беренче көннәрдән комсомоллар ил тормышында актив катнашалар: Урал һәм Себердә заводлар төзиләр, БАМ сузалар, чирәм җирләрне күтәрәләр, Донбасста күмер чыгаралар, Бөек Ватан сугышы фронтларында сугышалар, ә ул беткәч – җимерелгән хуҗалыкны күтәрәләр.  Комсомоллар һәрчак алдынгы рәттә булалар, үзләренең гамәлләре һәм эшләре белән Ватанны чиксез яратуларын раслыйлар.

Өлкән буын, безнең әбиләр һәм бабайлар, үзләренең комсомол яшьлекләрен җылылык белән искә алалар. Мин, үзенең яшьлеге турында сөйләгәндә, әбием Галина Владимировнаның күзләре ничек янганын хәтерлим.

Утызынчы еллар башында, Чистай педагогия училищесында укыганда ул комсомолга керә һәм бу аның тормышының иң дулкынландыргыч һәм мөһим мизгелләренең берсе була. Әбием барлык комсомол ячейкасы белән бергә басуларда эшләүләрен, икмәк әзерләү кампанияләрендә, шимбә өмәләрендә һәм демонстрацияләрдә катнашуларын, агитконцертлар үткәрүләрен, спектакльләр куюларын искә ала иде. Мәҗбүри төстә социалистик ярышлар оештырганнар, аларның җиңүчеләре исемнәрен гомуми җыелышта атаганнар. Иң яхшыларга комсомол итәге тегү өчен тукыма кисәге тапшырганнар. Бу һәрчак стимул биргән, ничек тә яхшырак эшләргә һәм алда булырга тырышканнар. Ә кичен – музыка, биюләр, уеннар, конкурслар.

Үзенең комсомол яшьлеге турында сөйләгәндә, әбием һәрчак комсомолның барыннан да бигрәк яшьлек дәрте, иптәшлек хисе һәм зур илнең бөек тарихына катнашың барлыгын тою икәнен билгели иде. Аның өчен комсомол тормыш мәктәбе, олы тормышка старт мәйданчыгы була.