Лаеш районы вәкилләре «Ышанам» дип исемләнгән фестивальдә катнаштылар

Бәйрәм Казан Мәрьям Ана иконасы храмы территориясендә һәм Түбән Кама районының Красный Ключ бистәсендә Кама яры буенда узды. Быел фестиваль Гаилә елына, хәзерге җәмгыятьтә гаилә һәм православие традицияләрен саклауга, шулай ук Александр Пушкинның тууына 225 ел тулуга багышланган иде.
Бәйрәм чаралары: концерт, күргәзмәләр, ярминкә, уен программасы, фотозоналар, интерактив мәйданчыклар, кыр кухнясы һәм башкалар — Түбән Кама халкын һәм кунакларны җәлеп итү үзәгенә әверелде. Алар рус көнкүреше предметларын ачык күрә, үзләренә рус халык киемнәрен киеп карый алдылар, мич һәм эрләү тактасы янында — рус йортының төп атрибутлары янында фотога төштеләр. Фестивальгә килгән һәр кунак рус көнкүреше атмосферасына чумды һәм үзен шул чорның бер өлеше итеп хис итә алды.
Вера Курынцева һәм Валентина Клюшина Лаеш районының Рус милли-мәдәни җәмгыятен тәкъдим иттеләр. Алар белән Түбән Камага җәмгыять рәисе Валентина Варина һәм Надежда Суханова барды. Вера Кузьминична үзенең «Безнең храм» шигырен укыды, ә Валентина Павловна Ватан турында җыр җырлады.
— Кешеләрнең, чиркәү хезмәтчеләренең, шәһәр администрациясенең, иҗтимагый оешмаларның берләшүе — болар барысы да православие мәдәниятенең рухи-әхлакый традицияләрен саклауга юнәлдерелгән иде. Фестивальне оештыручыларның зур әзерлек эшләрен һәм бик яхшы концерт номерларын билгеләп үтәсе килә, — дип үз фикере белән уртаклашты фестивальдә катнашучы.
Барлык катнашучылар да оештыручылардан Рәхмәт хатлары һәм истәлекле сувенирлар алдылар.