Менә бу кичә!

Лаеш районында бу бәйрәмне оештыручылар кешеләргә яхшы кәеф бүләк итәр өчен күп төрле фантазияләр һәм иҗат күрсәттеләр.

Лаешта мондый хәл булганы юк иде әле. Шәп! Күңелле! Кызык! Лаеш районында әзерләнгән программа теләсә кайсы зәвыкка исәпләнгән иде.

Иртәдән Лаеш техникумының футбол кырында футбол ярышлары башланды. Үз командаларын Лаеш, Габишево, Хәерби, Нармонка, 25 Октябрь исемендәге поселок, Кече Елга тәкъдим итте. Уен башта әйләнеш системасы буенча барды, аннары ярымфинал һәм финал узды. Лаеш районы авыл җирлекләре Спартакиадасы исәбенә футбол буенча команда ярышларында Нармонка футболчылары җиңде. Көмешне Лаеш балалары алды. Ә кечеелгалыларга бронза медальләр тапшырылды.

Ул арада «Кама диңгезе» пляжында туплы башка уенны яратучылар – волейболчылар җыелды. Нәтиҗәдә, беренче урынны «Атлантида» командасы уенчылары, икенчене – «Гараж» һәм өченче урынны Лаеш техник-икътисад техникумы спортчылары яулады.

«Кама диңгезе» яр буенда узган Яшьләр көненең йомгаклау өлешендә барысы да булды: концерт, шаян уеннар, җырлар, биюләр. Бирегә яшьләр дә, балалары белән яшь гаиләләр дә килгән иде. Хәтта әби-бабайлар да өйдә утыра алмаган. Программаның үзенчәлеге - DJ Vil төркеме чыгышы һәм күңелле күбек кичәсе булды, ул бәйрәмгә килгән һәркемдә дәртле көлү тудырды. Куе күбек куыкларына күмелгән балаларга һәм өлкәннәргә карап, көлүдән тыелып тору мөмкин түгел иде.

Концерт барышында шулай ук теге яки бу казанышлары өчен яшь кешеләрне бүләкләү дә булды. Җыелучылар район башлыгы Илдус Зариповның сәламләвен игътибар белән тыңладылар, ул район, республика һәм бөтен ил үсешендә яшьләрнең мөһим ролен ассызыклады.

Ә аннан соң Кама өстендә яңгыравык һәм дәртле музыка яңгырады – концерт программасы бик бай эчтәлекле булды. Халык яраткан артистларының чыгышын бик теләп тыңлады. Сәхнәгә Фидаил Вәлиуллин, Альбина Латыйпова, Гөлназ һәм Артур Гафуровлар гаилә пары, Алия Чернова һәм башка талантлы артистлар чыкты,  аларны тамашачылар бик җылы кабул итте. Уен-көлкеле музыкаль конкурсны көлмичә карап булмый иде. Анда иң кыюлар һәм тәвәккәлләр катнашты: диджей тәкъдим иткән музыкаль композицияне җырларга кирәк иде. Катнашучылар шундый тырыштылар! Барысы да нотага эләгә, ритмны тота алмады, тик моны, бер караганда, берәү дә таләп итмәде бит. Иң мөһиме, күңелле булды! Шуңа күрә алар яшьләр дә бит инде, тәҗрибә уңышсыз килеп чыкканда да шатлана беләләр. Афәрин, катнашучылар! Сез кыюлар һәм иң шәпләр!

Яшьләр көне ачык һавада бию һәм салют белән тәмамланды.

- Оештыручыларга рәхмәт: күптән болай ял итмәгән идем, - дип белдерде лаешлыларның берсе. - Яхшы идея. Хуплыйбыз!