Никольский тарихы китапта

Августның бу җылы кичендә авыл кешеләре телевизорлары каршында өйләрендә утырмадылар, ә дуслары һәм туганнары белән җирле мәдәният йорты каршындагы мәйданга җыелдылар. Монда коймаклар һәм бәлешләр белән сыйладылар, ә балалар өчен батут эшләде.

Авыл көне Сергей Трусовның “Русский вираж 1984. О каравоне и селе Никольском” китабын тәкъдир итү белән башланды. Аны Трусовның кызы Ангелина алып барды. Кызганычка каршы, автор үз китабын күрә алмады: 10 ай элек ул арабыздан китте. Җирле мәдәният йортының элекке директоры, “Каравон” ансамблен оештыручы һәм авыл җирлеге башлыгын якташлары бер минут тын калып искә алдылар. Китапның берничә данәсен Срегей Алексеевичның туганнары мәдәният йортына, мәктәпкә һәм китапханәгә бирделәр.

Бәйрәм концертының төп “йолдызлары” Матрена һәм Цветочек булды – “Новые русские бабки” юмористик дуэты геройлары. Алар авыл халкының күңелен шаян сүзләре белән ачтылар һәм аларны биергә чакырдылар. Авылда яшәүче өлкәннәргә, яңа өйләнешүчеләр, әти-әни булганнарга, беренче сыйныфка барачак балаларга Никольский авыл җирлеге башлыгы Эрнест Алеев бүләкләр тапшырды.

Тамашачылар алдында җирле талантлар: Ольга Казакова, Оксана Лобановская,  Олег Марфин, Наталья Воронина һәм башкалар чыгыш ясады. Моңлы тавышлы җырчылар һәм ут чыгарып биючеләр Лаеш районында яшәүче төрле милләт кешеләрен – руслар, татарлар, әрмән һәм башкалар – берләштергән халык мәдәниятенең төрлелеген күрсәттеләр.

Авылның төп мәйданында бергәләп фотога төшкәч бәйрәм дискотекасы башланды.