Туган телләр һәм Халыклар бердәмлеге елы старт алды

Осталык сәгатен Казан дәүләт мәдәният институты һәм Мәдәният һәм сәнгать өлкәсендә өзлексез белем бирү һәм квалификация күтәрү үзәге укытучылары үткәрде.

Чараны Татарстанның атказанган мәдәният хезмәткәре Илсөяр Шиһапова ачты. Шигъри-музыкаль композиция ярдәмендә ул мимика һәм интонация ярдәмендә туган телнең бөтен тирәнлеген, матурлыгын һәм көйлелеген җиткерергә тырышты. Сәхнә теле һәм дикторлык осталыгы белгече сөйләм һәм әдәби стильләр үрнәгендә корпоратив мәгълүматны кабул итүдә аерымлыклар булуын белдерде.

Татарстанның атказанган артисты, актерлык осталыгы буенча белгеч Азат Зарипов җитәкчеләргә аудитория алдында чыгыш ясарга ничек дөрес итеп әзерләнергә кирәклеген күрсәтте. Ул халык алдында чыгыш ясау сәнгатен үзләштерү буенча мөстәкыйль эш алып бару өчен практик тренинг үткәрде. Алып баручы барысына уңай кәеф «йоктыра» алды. Нерв киеренкелеген киметү өчен күнегүләр тыңлаучылар тарафыннан тамашачылар залы кәнәфиләрендә үк башкарылды.

Сәхнә теле белгече Земфира Ибәтова турыдан-туры аудитория белән эшләде. Презентация белән үрелеп барган чыгышында педагогика фәннәре кандидаты тыңлаучыларга әдәби телнең нечкәлекләрен, аның фонетикасын җиткерде. Осталык сәгатендә типик сөйләм хаталары һәм аларны бетерү ысуллары каралды. Кешеләр алып баручы артыннан аерым авазларның дөрес әйтелешен һәм сүзләрдәге басымны тату кабатладылар.

Музыкаль паузалар җыелучыларның игътибарын җәлеп итте. Татарстанның атказанган артисты Әлфис Галиуллинның баянда уйнавы һәм көчле тавышы залны сихерләделәр. Педагоглар һәм сәнгать кешеләре үз чыгышларына туган телгә булган бар мәхәббәтләрен салып, аның чикләренең байлыгын ачып салдылар, һәм әдәбиятта гына түгел, көндәлек тормышта да, шулай ук җитәкчеләр эшендә дә.

Чара ахырында Лаеш районы Советы аппараты җитәкчесе Азат Нурмөхәммәтов укытучыларга рәхмәт белдерде һәм мондый чараларның мөһимлеген ассызыклады.