Әдәбият буенча Державин премиясе иясенең исеме билгеле булды

Традиция буенча, бу көнне Казанда һәм Лаеш районында Гавриил Романовичның туган көнен бәйрәм итүгә багышланган тантаналы чаралар узды. Алар Казанның Лядской бакчасындагы Державин һәйкәленә чәчәкләр салудан башланды. Ләкин бәйрәмнең төп өлеше Лаешта узды.
Бөек якташыбыз исемен йөртүче шәһәр үзәк мәйданында Г. Р. Державин исемендәге Республика премиясен тапшыру тантанасы узды. Татарстан вице-премьеры Ләйлә Фазлыева шигърият бәйрәме кунагы булды.

Фестивальгә Мәскәү һәм Тамбов, Тольятти һәм Донецк шагыйрьләре, язучылары һәм галимнәре, шулай ук педагоглар, мәктәп укучылары, студентлар, шулай ук шәһәр һәм район халкы килгән иде.

Ләйлә Ринат кызы Лаеш районы Башлыгы урынбасары Татьяна Борһанова белән бергә юбиляр һәйкәленә чәчәкләр салды. Аннары алар 2023 елның әдәбият буенча Державин премиясе иясен бүләкләделәр. Ул «Казан журналистикасы тарихы турында очерклар (1758-1918)» китабы өчен Айрат Бик-Булатов булды. 

— Мин республиканың минем эшемне күрүен бик теләдем, — диде бүләкләү тантанасында Айрат Шамил улы. — Бу хезмәтнең меңгә якын бите минем Татарстанга бүләк булды.

«Карт Державин безне күреп алды...» балалар конкурсында җиңүчеләргә бүләкләрне Лаеш үзәкләштерелгән китапханә системасы директоры Любовь Кузьмина тапшырды. Ә Тамбовтан Мичурин дәүләт аграр университеты профессоры, Россия язучылар берлеге рәисе урынбасары Анатолий Труба Лаеш районына «Державинский» сортлы чия агачы үсентесен бүләк итте.

Шигырьсез нинди шигъри кичә инде ул? Әдәбиятчылар микрофонга килеп сугыш, мәхәббәт, дуслык, башка көнүзәк, һәм мәңгелек темалар турында төрле шигырьләр укыды. Лаеш һәм Казан артистлары юбиляр шигырьләренә романслар башкардылар. Ә шәһәрнең төп мәйданында чын театральләштерелгән шоу башланды. Тамашачылар алдында тантананың сәбәпчесе үзе һәм башка тарихи персонажлар терелде. 

Державинның мәдәни мирасы ике гасырдан артык вакыт узгач та зур әһәмияткә ия булып кала. Гавриил Романович эше яши һәм аның истәлеге Лаеш ягында хөрмәт ителә.