Шашлыклар фестивале гаилә командаларын җыйды

Фестивальдә сигез гаилә коллективы катнашырга теләк белдерде. Яшь буын ярышларда өлкәннәр белән беррәттән катнашты. Иң яшь шашлык ясаучыга нибары ун яшь иде!
Бәйрәмне оештыручылар барлык кирәкле әйберләр — мангал, күмер, шырпы, яндыру өчен сыеклык һәм, әлбәттә, ит белән тәэмин иттеләр. Иртә таңнан ук шашлык ясаучылар оештыручылардан тавык канатлары алдылар һәм маринад әзерли башладылар. Фестивальдә тавык шашлыгы өчен иң яхшы маринадны сайладылар. Монда инде останың фантазиясе һәм осталыгы берни белән дә чикләнмәде. Бал, анар согы, хрен, кинза, аджика, кефир — һәр гаиләнең ачык ялкында хуш исле итнең үз рецепты.
Осталар шашлык кыздырган арада, агромаркет каршындагы мәйданчыкта зур тамаша куелды. Иң кечкенәләрне яраткан мультфильм геройлары костюмнарындагы аниматорлар шатландырды. Барлык теләүчеләрнең битләренә бушлай аквагрим ясадылар. Ә чәчәкләр остаханәсендә матур букетлар төзергә өйрәттеләр. Барлык күңел ачулар да бушка булды. Моннан тыш, агромаркет сатып алучылары бу көнне лотереядә катнаштылар, анда төрле призлар һәм бүләкләр уйнатылды.
Алып баручы тамашачылар арасыннан өч жюри әгъзасын сайлап алды. Аларга иң тәмле шашлыкны сайларга һәм өч призерның исемен атарга кирәк иде. Әзерләнгән итнең барлык үрнәкләрен татып карагач, жюри карарны игълан итте. Иң яхшы шашлык ясаучылар «Усад» агромаркетыннан бүләк — сертификатлар алдылар. Әйтергә кирәк, алар үз маринадларының серен сакларга карар кылдылар. Бүләкләр барлык катнашучыларга да эләкте — күпсанлы тамашачыларны хуш исле шашлык белән сыйладылар. Ә иң ахырда лотерея уйнатылды.
«Усад» агромаркеты директоры Инсаф Вәлиев хәбәр иткәнчә, чарадан кергән акчаның бер өлеше хәйриягә һәм социаль проектларга — янгыннан зыян күрүчеләргә һәм мохтаҗларга ярдәм итүгә юнәлдереләчәк.