Яшь картингчылар характер күрсәтә

Лаеш районының "Лидер" картинг клубы спортчылары картинг буенча 14 нче Татарстан беренчелегендә лаеклы чыгыш ясадылар.

Ярышлар Саба районында узды. Һәр класста 23-25әр спортчы катнашты.

Вильдан Сәфәргалиев (Лаешның 2 нче мәктәбе, "Минск-125А" классы) һәм Ярослав Ватомов (Лаешның 1 нче гимназиясе, "Стриж" классы) 15 нче урын яулап, спортның экстремаль төрләрен яратучыларның "алтын" урталыгына урнаштылар.

Морат Әбүзәров (Лаешның 2 нче мәктәбе) һәм Дмитрий Теньгаев (Лаешның 1 нче гимназиясе) мондый абруйлы ярышларда беренче тапкыр катнаштылар.

-Мондый нәтиҗәләргә ирешү өчен балалар күп көч куйды, - ди картинг-клуб җитәкчесе Линар Сәфәргалиев. - Тренер Вячеслав Ватомов аларны киләчәктә призлы урыннар көтә дип саный, чөнки яшь картингчылар үз характерларын күрсәтә беләләр, бирешмиләр һәм җиңүгә омтылалар.