«Игелекле китап утравы»: Лаеш балалар китапханәсендә Халыкара игелекле эшләр көнен билгеләп үттеләр

  Очрашу барышында балалар Халыкара игелекле эшләр көненең тарихы һәм әһәмияте турында белделәр, шулай ук аны Россиядә һәм чит илләрдә бәйрәм итү традицияләре белән таныштылар. Көн программасы бик бай һәм файдалы булды. Китапханәнең яшь кунаклары игелекле китаплар тупланмасы белән танышып кына калмыйча, үз куллары белән "игелек утравы«н төзүдә дә актив катнаштылар.
Балалар өчен игелекле теләкләр язылган кыстыргычлар ясау буенча мастер-класс оештырылды. Һәр катнашучы үзенең иҗади проектына җылылык өлеше кертә алды — мондый кыстыргычлар киләчәк укучылар өчен күңелле бүләк булачак.
Программаның аеруча мөһим өлеше — китапларны «коткару» акциясе иде. Балалар зур дәрт белән эшкә керештеләр: битләрне ябыштырдылар, китап тышларын ныгыттылар һәм чистарттылар. Һәр төзәтелгән китап — ул яңа буын укучыларын сөендерәчәк сакланып калган тарих.
Чараның атмосферасы чынлап та җылы булды: балалар игелек турында уй-фикерләре белән бүлештеләр, үзләре кылган яки кылырга теләгән яхшы эшләре турында сөйләделәр һәм башка балаларга теләкләр калдырдылар.
Китапханә хезмәткәрләре билгеләп үткәнчә, мондый вакыйгалар яшь буынны тәрбияләүдә мөһим роль уйный. Алар балаларда шәфкатьлелек, ярдәмчеллек кебек сыйфатларны үстерүгә һәм дөньяны кечкенә, ләкин мөһим гамәлләр аша яхшыртуга омтылыш уята.
«Игелекле китап утравы» игелекле эшләр көне генә түгел, ә якты уйлар һәм игелекле гамәлләр бәйрәме булды, ул балаларның да, өлкәннәрнең дә хәтерендә калачак.
Фотолар авторы: Тәнсылу Вафина.