Лаеш районында яшәүче соңгы Бөек Ватан сугышы ветераны — Габдрахман Сафин 104 яшендә вафат булды.

    104 нче яшендә Бөек Ватан сугышының тере легендасы, соңгы фронтовигыбыз Габдрахман Сафин вафат булды. 
Габдрахман Сафин — тарихыбызның тере хәтере иде. Ул 1922 елның 31 мартында Арча районының Симетбаш авылында туа. 1941 елның канлы көзләрендә фронтка китә. Ивановода һава-десант гаскәрләрендә катгый әзерлек үткәч, аны Сталинградның утлы казаннарына җибәрәләр. Полкындагы йөзләгән иптәшеннән нибары 30 кеше генә исән кала... Язмыш аны әсирлеккә дучар итә.
Ләкин ул сынмый! Тоткынлыкның иң авыр көннәрендә Габдрахман ага бөек татар шагыйре Муса Җәлил һәм Абдулла Алиш белән очраша. Бу очрашулар аның күңелендәге җиңүгә өметне сүндерми. 1943 елның мартында ул үлемне җиңеп, әсирлектән кача һәм яңадан сафка баса.
Җиңү юлы аны 50нче гвардия дивизиясе составында Берлинга кадәр илтә. Рейхстагны штурмлауда катнашып, ул Иосиф Сталинның шәхси Рәхмәт хатына лаек була.
Габдрахман ага — горурлык, сабырлык һәм какшамас рух үрнәге. Ул үзенең бер гасырдан артык дәвам иткән гомер юлын зур дәрәҗә белән үтте. Лаеш районының соңгы легендар ветеранының якты истәлеге күңелләрдә мәңге сакланыр.