Лаеш районының 26 мәктәбендә «Татарча диктант» яздылар

Акция бөтен дөньяда яшәүче татар телендә сөйләшүчеләрнең грамоталылыгын тикшерүгә, әдәби татар телен белүгә кызыксынуны арттыруга юнәлдерелгән иде. 

Быел акциядә Лаеш районының 525 кешесе катнашты. Алар арасында: укучылар, студентлар, ата-аналар, әбиләр һәм бабайлар, җәмәгатьчелек вәкилләре. 

Лаешта диктантны Советлар Союзы Герое Борис Кириллович Кузнецов исемендәге 2 нче урта мәктәп базасында яздылар. Диктантта Лаеш шәһәренең өлкән сыйныф укучылары мәктәп укучылары һәм җәмәгать эшлеклеләре катнашты.

Диктантның текстын мәгариф идарәсе методисты Лария Сафина укый.
Лаешта «Татарча диктант» акциясендә даими катнашучы — язучы Рәзит Сибатов. Һәм бу юлы без аны хатыны белән бергә катнашучылар рәтендә күрдек. Рәзит Хөрмәтович текстны, аңлау өчен мәктәп укучылары өчен бик катлаулы дип әйтте. Бу гомеренең күп өлешен чит илдә яшәгән эмигрантның улы белән сөйләшүе. Бу туган як, туган илне сагыну турында истәлекләр, туган ил турында сагыш. Аның хыяллары бер оныгы булса да аның ата-бабалары җирен күрә алуы белән бәйле.

Без Рәзит Сибатовтан диктантта катнашу аның өчен нәрсә аңлата дип сорадык. — Минем өчен бу- туган телеңне белергә, синең татар булуың белән горурланырга кирәклегенә ныклы ышаныч. Мондый чараларда катнашу хәтерне яңарта, телне камилләштерә ,- дип уртаклашты Рәзит Хөрмәтович.
Текстларга килгәндә, Татарстан халкы Рөстәм Галиуллинның «Тажетдин Ялчыгол» әсәреннән өзек («Васыять»/ «Наказ» җыентыгыннан), Россия төбәкләре өчен Марсель Галиевның «Тимә, яшәсен!», ә чит илләрдә татарлар Фоат Садриевның «Туган җир» әсәреннән өзек яздылар.