Лаеш районы МХО зонасына 20 тонна гуманитар ярдәм китерде

Район башлыгы Илдус Зарипов команда белән 13 хәрби частька техника, азык-төлек һәм төзелеш материаллары тапшырды. Йөк арасында — ике «Нива», квадрокоптерлар, генераторлар, 1700 порция өй ризыгы, 120 маскировка челтәре һәм мәктәп укучыларыннан тәм-томнар. 
«Бу ярдәм-гомуми хезмәт нәтиҗәсе. Эшмәкәрләр, укытучылар, балалар — барысы да кушылды, — диде Илдус Зарипов. — Без йөк җибәреп кенә калмадык, ә чын кирәкле әйберләрне: элемтә өчен рацияләр, позицияләрне ныгыту өчен инструментлар, окоп шәмнәрен җыйдык. Сугышчылар белә-Лаеш районы алар белән». 

Ярдәм исемлегенә 4 квадрокоптер, 5 рация, 2 «Нива» автомобиле, генераторлар, эретеп ябыштыру аппаратлары, 1700 порция өй ризыгы, 120 маскировка челтәре, витаминлы чәй, район мәктәп укучыларыннан татлы ризыклар, блиндажлар өчен инструментлар, окоп шәмнәре, челтәрләр, 3 ноутбук, 2 компьютер, дроннар өчен аккумуляторлар кергән. 
Миссияне Лаеш районы администрациясе һәм районның «Үзебезнекеләргә ярдәм» хәйрия фонды җирле эшмәкәрләр һәм халык ярдәме белән оештырды. «Киләсе йөкне формалаштырабыз инде. Безнең яклаучылар тылның алар өчен эшләвен сизүләре бик мөһим», — дип өстәде Зарипов.