Киләчәк энергетикасы – Лаеш районында

Россия Президенты ярдәмчесе Лаеш районында халыкара форумда булды

“Казан-Экспо” күргәзмәләр комплексында энергетика һәм энергоресурсларның нәтиҗәлелеге буенча Татарстан халыкара форумы (ТЭФ-2022) һәм ХХII халыкара “Энергетика. Ресурсосбережение-2022” махсус күргәзмәсе үтте.

Форумда Россиянең 34 төбәгеннән 63 компания һәм Татарстаннан 29 компания катнашты. Тантаналы ачу вакытында Россия Федерациясе президенты ярдәмчесе Игорь Левитин, Татарстан Республикасы Президенты Рөстәм Миңнеханов, Түбән Новгород өлкәсе губернатор урынбасары Сергей Морозов катнашты.

-Энергетика һәм энергия ресурсларының нәтиҗәлелеге буенча халыкара Татарстан форумы үзен фикерләр алышу һәм яңа технологияләр һәм проектларны тәкъдим итү, яңа җиһазлар һәм материаллар күрсәтү өчен абруйлы платформа итеп танытты. Энергия нәтиҗәлелеге һәм әйләнә-тирә мохитне саклау – бу безнең өстенлекле бурычлар, аларны хәл итү безнең икътисадның көндәшлеккә сәләтен арттыруга һәм гражданнар өчен уңайлы мохит булдыруга булышачак, - дип билгеләп үтте Рөстәм Нургалиевич.

“Казан-Экспо” территориясендә ТЭФ-2022 эшлекле программа кысаларында ТР Хөкүмәте утырышы булды. Утырышта “Татарстан Республикасында энергия ресурслары нәтиҗәлелеге” һәм 2022 елга бурычлар төп темалар булды.

Өч көн дәвамында күргәзмәдә “түгәрәк өстәлләр” һәм семинарлар булды, аларда министрлыклар һәм сәнәгать компанияләре башлыклары энергетика тармагын үстерү мәсьәләләрен тикшерделәр. Форумда катнашучылар өчен хәзерге икътисади шартларда энергетика комплексын үстерү, илебездә электр транспорты комплексын модернизацияләү, энергия саклаучы технологияләр куллану буенча дискуссияләр әзерләнде. Тикшерүләр анда да, онлайн форматта да үтте.