«Җәяүле» операциясе

Акциянең максаты — җәяүлеләр катнашында юл-транспорт һәлакәтләрен киметү һәм юлларда куркынычсызлык дәрәҗәсен арттыру.
— Операция барышында җәяүлеләр кичүләрен узганда кагыйдәләрне бозучы машина йөртүчеләргә аерым игътибар бирәчәкбез, — дип сөйли Лаеш районы буенча ЭЭМ бүлегенең ЮХИДИ бүлекчәсе начальнигы вазыйфаларын башкаручы Рәдиф Закиров. — Шулай ук тиешсез урыннарда юл аша чыгучы җәяүлеләр белән профилактик әңгәмәләр дә үткәреләчәк. Машина йөртүчеләр арасында да, җәяүлеләр арасында да юл йөрү кагыйдәләрен бозучылар игътибарсыз калмаячак.
Чара кысаларында яктылыкны кире кайтара торган элементлар киюнең мөһимлегенә аерым басым ясалачак, бу исә тәүлекнең караңгы вакытында җәяүлеләрне күрүне сизелерлек арттыра.
Оештыручылар юл хәрәкәтендә катнашучыларның барысын да игътибарлы булырга һәм юлларда гомерләрен һәм сәламәтлекләрен саклап калу өчен кагыйдәләрне үтәргә чакыра.