Азат Нурмөхәммәтов: «Мондый һәр фаҗига - кагыйдәләрне үтәмәү нәтиҗәсе»

Машина йөртүчеләрне һәм ата-аналарны сак булырга һәм юл йөрү кагыйдәләрен төгәл үтәргә чакырабыз. 

Беренче фаҗига 20 апрельдә төн уртасында Лаеш районында М-12 «Восток» трассасында була: 20 яшьлек мотоциклчы, зур тизлек белән Екатеринбургка таба барганда, кинәт юлга чыккан пошига бәрелә. Егетнең нибары 8 ай машина йөртү стажы булган һәм соңгы ярты елда тизлекне арттырган өчен дүрт штраф салынган. Ул тулысынча җиһазландырылган була, ләкин бу аның гомерен саклап кала алмый: егет шунда ук һәлак була. 

Шул ук көнне Питрәч районында квадроцикл белән хокуксыз һәм тәҗрибәсез идарә иткән 15 яшьлек кыз юлга чыга һәм Škoda автомобиле белән бәрелешә. Һәлакәт нәтиҗәсендә квадроциклның 12 яшьлек пассажиры һәлак була, ә яшь автоледи авыр җәрәхәтләр ала. 

Өченче юл-транспорт һәлакәте Минзәлә районында булган: 64 яшьлек Lada Vesta йөртүчесе борылганда 20 яшьлек LADA Priora машина йөртүчесенә юл бирмәгән. Бәрелеш өлкән яшьтәге ир-атның үлеменә китергән. Ә аның 2004 елгы пассажиры җәрәхәтләр белән хастаханәгә озатыла. 

ЮХИДИ искә төшерә: питбайклар, мопедлар һәм квадроцикллар уенчыклар түгел, ә югары куркыныч чаралары. Алар белән идарә итү «М» категориясе хокуклары булганда 16 яшьтән генә рөхсәт ителә, ә питбайклар гомуми файдаланудагы юлларда бөтенләй тыелган. 

«Әти-әниләр, уйланыгыз! Балага шундый техника сатып алып, сез аның гомерен куркыныч астына куясыз. Хәтта бер хата да фаҗигагә китерергә мөмкин», — дип ассызыклый Лаеш районы буенча ЮХИДИ юл хәрәкәте кагыйдәләрен пропагандалау буенча инспекторы Ринат Дәүләтшин. 
Юл хәрәкәте кагыйдәләре буенча район комиссиясе рәисе Азат Нурмөхәммәтов машина йөртүчеләрне һәм ата-аналарны җаваплылыкка тартты:

— Мондый һәр фаҗига-кагыйдәләрне санга сукмау нәтиҗәсе. Барлык машина йөртүчеләрдән үтенеп сорыйм: юл шартларын исәпкә алып тизлекне сайлагыз, маневрларда өстенлекне саклагыз һәм хәрәкәттә катнашучы башка кешеләргә игътибарлы булыгыз. Әти-әниләр! Балаларыгызның ни белән мәшгуль булуын контрольдә тотыгыз. 
Хокук бозучыларны җитди нәтиҗәләр көтә: хокуксыз йөргән өчен штраф 15 мең сумга җитә, ә руль артына 16 яшьтән кечерәк яшүсмер утырса, аның әти-әнисен административ җаваплылыкка тартылачак. 

Тормыш тизлектән, минутлык саксызлыктан яки «минем белән мондый хәл булмаячак» дигән иллюзиядән мөһимрәк.