Киләсе ел Игелекле эшләр елы булачак

Халык бәйрәмнең рәсми ачылышына кадәр үк җыелган иде. Күңелсезләнергә туры килмәде. Тюбингта һәм понида йөрү, кайнар чәй һәм музыка астында биюләр шәһәр кешеләрен һәм район үзәге кунакларын җылытып җибәрделәр. Кешеләр чыршы һәм аның янында урнаштырылган зур боз скульптуралары фонында фотога төштеләр.

Тантана балалар өчен программадан башланды. Алар әйлән-бәйлән уйнадылар, биеделәр һәм күңел ачтылар. Аниматорлар малайларга һәм кызларга яңа ел табышмаклары әйттеләр, аларга җавап биргән өчен алар призлар алдылар. Аннан соң балалар иң көтелгән кунакларны – Кыш Бабай һәм Кар кызын чакыра башладылар. Аларның сәхнәгә чыгуы балаларны сокландырды. Яңа ел персонажлары лаешлыларны үзләренең биюләре белән дәртләндерделәр. Ә аннан соң бәйрәмнең кульминациясе вакыты җитте.

-Бер, ике, өч, - чыршы, кабын! - Яңа ел могҗизасын көтеп, балалар һәм өлкәннәр хор белән кычкырдылар.

Берничә секундтан соң кичке Лаеш күген яшел чибәркәй утлары яктыртты. Мәйдан яктырып китте.

Лаеш районы башлыгы Илдус Зарипов шәһәр халкын якынлашып килүче бәйрәм белән котлады.

- 2020 ел беребез өчен дә җиңел булмады, - диде Илдус Фатыйхович. - Әмма барлык чикләүләргә һәм кыенлыкларга карамастан, без барлык планнарыбызны да тормышка ашыра алдык. Киләсе елда районда яңа объектлар ачу өчен эшне дәвам итәчәкбез. 2021 елның барыбыз өчен дә уңышлы булуын телим. Барлык кешедә дә Яңа ел кәефе булсын.

Район башлыгы урамнарны бәйрәмчә бизәү буенча иң яхшы эшләр авторларын бүләкләде. Бүләкләр һәм призлар белән белем бирү учреждениеләре, шәхси, дәүләт предприятиеләре һәм шәһәрнең гади кешеләре – Лаешта кышкы могҗиза атмосферасын тудырган кешеләр бүләкләнде.

«Пегас» утлы шоуы белән Түбән Кама артистлары Яңа ел кичәсенең кунаклары булды. Пиротехник тамаша чын ыгы-зыгы уятты. Бәйрәмгә килүчеләр түбәнкамалыларның осталыкларына сокландылар һәм тамашаны видеога төшерергә ашыктылар, чөнки мондый хәлләрне көн саен үз күзләрең белән күреп булмый. Бәйрәм кичке күккә салют җибәрү белән тәмамланды.

-Ура! Яңа ел котлы булсын! - дип бер-берсен котладылар танышлар һәм бик үк таныш булган кешеләр.

Ә Кыш Бабай киләсе елның Игелекле эшләр елы булуын искә төшерде. Тылсымчы булу җиңел – тирә-юньдәгеләргә яхшылык эшләү генә дә җитә.