Татарстан Рәисе Лаеш районының Комлы Ковал авылында яңа балалар бакчасы ачты

Соңгы елда безнең районда берьюлы берничә зур мәгариф объекты ачылды. 2024 елның сентябрендә беренче балаларны «Инноватика» һәм «Гармония» күппрофильле лицейлары, шулай ук Кече Кабан авылындагы «Самолет» балалар бакчасы кабул итте. Октябрьдә Сокурыда «Рамазан» шәхси балалар үсеше үзәге эшли башлады. Һәм менә

Комлы Ковал халкы көткән яңа мөһим социаль объект. 220 урынга исәпләнгән ике катлы бина төзелеше 2024 елның җәендә башланган һәм сигез айда тәмамланган.

«Умка» балалар бакчасы ачылышына Татарстан Рәисе Рөстәм Миңнеханов килде. Рөстәм Нургали улы Лаеш районы башлыгы Илдус Зарипов белән яңа социаль объектны карады. Беренче катта яшь ярымнан алып өч яшькә кадәрге балалар өчен биш төркем ячейкасы, өч яшьтән өлкәнрәк балалар өчен бер төркем ячейкасы, азык-төлек блогы, медицина кабинеты, лифт холлы урнашкан. Икенче катта өч яшьтән өлкәнрәк балалар өчен алты төркем ячейкасы, музыка һәм физкультура дәресләре өчен заллар, методика кабинеты, сенсор бүлмәсе, лифт холлы урнашкан. Подвал (техник) катында индивидуаль җылылык пункты, венткамера, су үлчәү узелы, аерым чыгу юлы булган насос бүлмәсе урнашкан.

Балалар бакчасын ачу тантанасы чыгышында Рөстәм Миңнеханов билгеләп үткәнчә, Татарстанда республика киләчәге өчен барысы да эшләнә. Ә аның киләчәге-балалар: 

— Компакт тәрбия һәм белем бирү комплексы, балалар бакчасы һәм лицей янәшәдә. Бик матур табигать, матур йортлар, балалар да — безнең киләчәгебез. Балаларыбызга нәрсә салсак, шуны алачакбыз. Биредә аларны үстерү өчен барлык мөмкинлекләр дә бар: спорт та, моторика да, традицияләр дә, телләр дә. Боларның барысын да сакларга кирәк. Әмма иң мөһиме — балаларның бәхетеннән ләззәтләнү. Бу иң мөһиме. Безнең һәрберебез киләчәк турында уйларга тиеш, ә киләчәк — безнең балалар. Бирегә күченергә карар кылган, шушы матур урында яшәүче кешеләр өчен бу комплексның хезмәт итәчәгенә мин бик шат. Моннан китәсе дә килми. Балаларга уңайлы булачак. Күргәнемчә, монда профессиональ состав бик җитди.

«Умка» яңа балалар бакчасында мәктәпкәчә яшьтәге балаларны уңайлы тәрбияләү өчен барлык шартлар да тудырылган.

Бу хакта Лаеш районы башлыгы Илдус Зарипов та сөйләде:

— Бүген гаиләләр, балаларыбыз өчен зур бәйрәм. Озак көтелгән яңа балалар бакчасы ачыла. Былтыр монда кыр, буш урын булган. Һәм менә бер ел эчендә бу могҗиза барлыкка килде: 500 урынлык мәктәп тә, балалар бакчасы да төзелде, тротуар яктыртылган юллар да, бөтен коммуникацияләр дә төзелде. Комлы Ковал — яхшы урын, әмма мәктәпсез, бакчасыз комфорт ул тулы комфорт түгел. Шуңа күрә бүген, балалар бакчасы ачылу белән, бу безнең районда иң яхшы урын дип әйтергә була. Бу балалар бакчасы өчен зур рәхмәт, Рөстәм Нургалиевич.