100 яшьлеге белән котлыйбыз: Лаеш районында фашист Германиясен Җиңүнең 80 еллыгы уңаеннан беренче медаль тапшырдылар

Фото авторы — Денис Фролов.

— Настя апа гаҗәеп кеше, аның белән аралашу шулкадәр кызык! Моны аны белгән һәркем билгеләп үтә!- Анастасия Дмитриевна турында шәһәр халкы әнә шулай дип сөйли.
Аны матур юбилее белән Лаеш районы башлыгы Илдус Зарипов котлады. Лаеш районында беренче булып Анастасия Дмитриевнага «1941-1945 еллардагы Бөек Ватан сугышында Җиңүгә 80 ел» юбилей медален тапшырды.

Үзенең тәрбияләнүчесен йөз еллыгы белән «Алтын көз» халыкка социаль хезмәт күрсәтү комплекслы үзәге директоры Ольга Башкирова һәм җәмәгатьчелек вәкилләре котлады. 

Анастасия Дмитриевна Александрова 1925 елның 11 февралендә Татарстан АССРның Люткино авылында туа. Сугыш килгәндә аңа 16 яшь була. Анастасия Дмитриевнаны, башка шундый ук үсмерләр кебек үк, һөҗүм итүче фашистлардан шәһәрне саклау өчен, Сталинград янына окоплар казырга җибәрәләр. 

— Окоплар казыдык һәм, күренмәсен өчен, агачлар белән маскировкаладык. Анда кешеләр күренми иде, — дип искә ала Анастасия Дмитриевна. 

«Минем саперларым штаб өчен блиндажлар казыдылар, авыл кызлары Петропаловка буйлап икенче рубеж казыдылар», — дип язган үзенең атаклы «Сталинград окопларында» повестенда Виктор Некрасов. Ә бит ул кызлар арасында безнең Настенька да булган, ул вакытта әле ул бөтенләй нәфис һәм яшь.

Сталинградтан соң Анастасия Казанга килә һәм сугыш ахырына кадәр дары заводында эшли, анда снарядлар ясый. 
Сугыштан соң Анастасия Дмитриевна туган авылына кайта, анда колхозда эшли. 

Кияүгә чыга, өч ул таба. Ирен иртә югалткан, берүзе балаларын аякка бастыра. 70нче елларда Анастасия Дмитриевна Лаешка күченә.

Пенсиягә чыкканчы хастаханәдә эшли, һәрвакыт иң ярдәмчел һәм хезмәт сөючән була. Аның фотосы һәрвакыт Мактау тактасында була. Хезмәт ветеранының хезмәт стажы — 52 ел.

Район башлыгы юбилярга сәламәтлек һәм шатлык теләде. «Аның кебек кешеләр — безнең тере мирасыбыз. Без аларның тарихларын сакларга бурычлы», — дип ассызыклады Илдус Зарипов.
Анастасия Дмитриевнага тирән хөрмәт белән нык сәламәтлек, киләчәккә ышаныч, озын һәм бәхетле гомер телибез!