Әйдәп баручы булырга һәм үз тамырларыңны онытмаска

«Идел» яшьләр үзәге фотосы

«Идел» яшьләр үзәге базасында Татар яшьләренең «Максат» лидерлар мәктәбе булды.

Матюшинога Россиянең 19 төбәгеннән татар яшьләр оешмалары җитәкчеләре һәм активистлары килде. Катнашучылар сөйләгәнчә, алар дүрт көндә күп кенә кызыклы лекцияләрдә, файдалы тренингларда, түгәрәк өстәлләрдә, күренекле кешеләр белән очрашуларда булганнар.

Психологлар, радио алып баручылар, галимнәр һәм сәясәтчеләр алар белән дәресләр үткәрделәр. Яшь активистлар дүрт көн дәвамында иҗтимагый эшчәнлек һәм шәхси вакыт балансы, нейрочелтәрләрдән файдалану һәм эшлекле сөйләшүләрне грамоталы алып бару кебек мөһим аспектларны өйрәнделәр.

Эшлекле рәсмилекне киметү өчен «Millihasite» иҗат берләшмәсе смена кунакларына гадәттәге халык костюмнарын күрсәтте, ә Наилә Галиева теләге булганнар белән милли киемнәрдә фотосессия үткәрде. Свердлау өлкәсеннән килгән «Яшен» татар берләшмәсе иҗат кичәсе инициаторы булды һәм «Каз өмәсе» интерактив дәресе үткәрде. Ә татарларның Федераль милли-мәдәни автономиясе яшьләр оешмалары вәкилләре арасында 100 мең сум акча уйнатты. Башкортстан, Удмуртия, Киров, Новосибирск, Самара, Свердлау һәм Тверь өлкәләре, шулай ук Пермь крае вәкилләре үз проектларын тәкъдим иттеләр. ТаtahStories проекты белән Эльмира Мифтахова һәм Төбәкара татар яшьләре слеты проекты белән Диана Мөбарәкова җиңү яулады.

Татар яшьләре әйдәп баручылар мәктәбендә катнашучылар чара турындагы фикерләрен язганда үзләре белән кирәкле урында файдаланып була торган яңа белемнәр алып китүләрен күрсәткәннәр.