Лаеш балалар сәнгать мәктәбе Әниләр көненә искиткеч концерт әзерләгән.

Сәнгать мәктәбенең икенче катындагы фойеда килүчеләрне мәктәпнең рәсем буенча укучылар эше күргәзмәсе каршы алды. Пейзажлар, аппликацияләр һәм натюрмортлар җепләрдән һәм киездән ясалган паннолар белән аралашкан.

Ә залның үзендә матур итеп яктыртылган сәхнәдә ике кара рояль урын алган. Концерт программасын алып баручы Дарья Массарова килүчеләрне иң якын һәм олы бәйрәм — Әниләр көне белән котлады һәм концертны музыка мәктәбенең өченче сыйныф укучысы Амелия Мингазова чыгышы белән ачты. Софья Кузьмина, Аня Шалагина һәм Зәринә Мингазова әниләргә багышланган шигырьләр сөйләделәр. Ә Эвелина Вәлиева «Мама» җырын башкарды.

Дүртенче сыйныф укучысы Алена һәм алтынчы сыйныф укучысы Екатерина Мордовскаялар бер-бер артлы Шитте этюдларын башкардылар. Григ, Шуман, шулай ук Скрябин һәм Ключаров әсәрләре җиденче сыйныф укучысы Елена Денисова һәм сигезенче сыйныф укучысы Лидия Калиткина башкаруында яңгырады. Кызларның куллары клавишлар өстендә күбәләк канатлары кебек очты.

Музыка мәктәбенең сигезенче сыйныф укучысы Софья Массарова Гранадос һәм Чайковскийның «Времена года» циклыннан әсәрләр башкарды. Ә Арина Чазова аккомпаниатор Елена Калиткина белән тамашачыларга Яруллинның «Шүрәле» балетыннан музыка тәкъдим иттеләр.

Анастасия Автомонова бар кешене бәйрәмгә багышланган җырлардагы рус фольклоры белән сөендерде. Роза Фатыйхова башкаруында «Молитва» җырын тыңлап күпләре ирексездән аккан күз яшьләрен сөрттеләр — ул шулкадәр үзәкләргә үтә торган итеп бар күңелен кушып җырлады. Ева һәм Ясон Галиәскәровларның дүрт кул белән Верди әсәрләрен башкаруы бар кешене таң калдырды. Зал аларның ялгыз башкаруларын да алкышларга күмде. Ева Мендельсон һәм Шопен музыкасын искиткеч уйнады. Ә Ясон залны Шопен һәм Брамсны башкаруы белән сокландырды. Көйләр музыкант кулы астыннан очып чыгып һавага таралды. Виртуоз башкару җыелучыларны тын да алмый тыңларга мәҗбүр итте, ә соңгы аккордта алкышларга күмелде.

Бәйрәм музыка мәктәбе укытучылары Дарья Массарова һәм Елена Калиткина дуэты белән тәмамланды, алар Моцарт Дебюсси, Яруллин һәм Рахманинов әсәрләрен башкардылар.

Концерт бер тында үтте. Балалар һәм өлкәннәрнең музыкаль композицияләре, шигырьләр һәм җырлары залны борчылырга да, шатланырга да, моңсуланырга да һәм башкаручылар белән елмаерга да мәҗбүр итте. Килүчеләрнең барысы көчле тәэсирләр алды, чөнки сәнгать мәктәбе чын талантларны ача һәм үстерә.