Сәнәгать легендасы

Айгөл Курченкова фотосы

Нур Шакиров Казан медицина инструментлары заводын нәкъ 40 елга якын җитәкли!

Һәрбер эре предприятие җитәкчесе үз төбәгенең киләчәк архитекторына әверелә. КМИЗ генераль директоры — нәкъ менә шундый кеше. Аның җилкәсендә 80 еллык гомер юлы гына түгел, ә ярты гасырлык уңышлы идарә итү тарихы, күпсанлы бүләкләр һәм мактаулы исемнәр, иң мөһиме — Лаеш районы һәм Татарстан иминлеге өчен армый-талмый эшләү тора.

Нур Хәмзин улы 1946 елның 21 июлендә Арча районының Иске Кишет авылында туган. Быел ул үзенең 80 яшьлек юбилеен билгеләп үтә — бу һәр кеше өчен, аеруча ватан сәнәгате тарихында тирән эз калдырырга өлгергән шәхес өчен зур дата булып тора.

Аның хезмәт биографиясе 1963 елда Казан мотор төзелеше җитештерү берләшмәсендә башлана, анда ул токарь булып эшли башлый. 1969 елда Казан авиация институтын тәмамлый. Җаваплы егетне мастер, аннары өлкән мастер итеп билгелиләр. Алга таба ул «Мединструмент» фәнни-җитештерү берләшмәсенең җитештерү буенча генераль директор урынбасары дәрәҗәсенә кадәр күтәрелә. 1987 елдан башлап Нур Шакиров Казан медицина инструментлары заводын җитәкли, предприятиене Россия медицина сәнәгате флагманына әверелдерә.

Бүгенге көндә КМИЗ — Хәерби авылында урнашкан, полимер материаллардан бер тапкыр кулланыла торган медицина эшләнмәләре җитештерүче заманча предприятие. Биредә Италиянең газ стерилизаторлары урнаштырылган, инструментларны упаковкалау һәм җыю җайга салынган. КМИЗ генераль директоры Нур Шакировка 2021 елның 6 сентябрендә Лаеш районының мактаулы гражданы исеме бирелде.

«Бу исем шәхсән миңа гына бирелмәде, — диде Нур Хәмзин улы бүләкне кабул иткәндә. — Бу — уңышлы эшләүче һәм заманча технологияләр кертүче бөтен коллективның хезмәтен тану».

Нур Шакиров уңышлы җитәкче генә түгел. Ул башкаларның кайгысына беркайчан да битараф калмый торган кеше. Махсус хәрби операциянең авыр чорында ул мобилизацияләнгән хезмәткәрләрнең гаиләләре өчен ышанычлы таяныч булды. МХО зонасына гуманитар йөкләр җибәрде. Шакиров шулай ук ятим балаларга, инвалид балаларга, авылның өлкән яшьтәге кешеләренә ярдәм итә.

Генераль директор акчалата гына түгел, ә җылы сүз, киңәш һәм үз ярдәме белән дә булыша.

КМИЗ җитәкчесенең кешелеклелеге турында ире МХОга кадәр әлеге заводта эшләгән Эльвира Галиева сөйли:
«2022 елда иремне мобилизацияләделәр. Безнең гаилә өчен авыр чорлар башланды. Сагышлы көннәрдә Нур Хәмзинович безгә, мобилизацияләнгән сугышчы гаиләсенә, ярдәм оештырды, безгә рухи һәм матди ярдәм күрсәтте. Аңа ярдәм сорап күп тапкырлар мөрәҗәгать иттем, һәм ул һәрвакыт җавап бирде. Аның ярдәме безнең өчен чын коткару булды. Авыр минутта күрсәткән игелеге, ярдәмчеллеге һәм булышлыгы өчен аңа чын күңелдән рәхмәтлемен».

Бүгенге көндә Шакиров җитәкчелегендәге КМИЗ — югары сыйфатлы медицина эшләнмәләре җитештерүче генә түгел, ә Лаеш районының социаль-икътисади үсешенә сизелерлек өлеш кертүче предприятие дә булып тора.

Нур Хәмзин улы Шакиров чын лидерлыкның бизнес-максатларга ирешүдә генә түгел, ә кешеләр турында кайгыртуда да икәнлеген исбатлады. Аның тормышы — барыбыз өчен дә үрнәк булып торган уңыш, эшсөючәнлек һәм кешелеклелек тарихы.

Аның юлы һәрвакыт уңышлар, рәхмәтләр һәм хөрмәт белән тулы булсын!