Татарстанлыларны Корбан гаете өчен сарыкларны республика эченнән генә алырга чакыралар

ТР Министрлар Кабинетының Ветеринария баш идарәсе җитәкчесе урынбасары Габдулхак Мотыгуллин сүзләренчә, төбәктә бу хайваннар җитәрлек дәрәҗәдә — 200 мең башка якын.
«Каядыр барып хайваннар сатып алырга бернинди ихтыяҗ юк. Без үз сарык малларыбызга тулысынча гарантия бирәбез. Бу, шулай ук, үзебезнең авыл хуҗалыгы товар җитештерүчеләренә ярдәм дә булачак», — дип ассызыклады Мотыгуллин.
Ул шулай ук узган ел Татарстанның махсус мәйданчыкларында 13 мең хайван корбан ителүен, шуларның 6,4 меңнән артыгы Казанга туры килүен хәбәр итте.
Хәзерге вакытта Татарстан хайваннар һәм кош-кортларның аеруча куркыныч инфекцион авырулары буенча имин төбәк санала. Инфекцияләр таралуны булдырмау өчен республикада малларны вакцинацияләү һәм эшкәртү үткәрелә. Күрше Чувашиядәге пастереллез белән бәйле вәзгыятькә аерым игътибар бирелә, аннан хайваннар кертү вакытлыча туктатылган.
Татарстанга малларны Ветеринария баш идарәсе белән килештереп һәм алдан сорау җибәреп кенә кертергә рөхсәт ителә. Һәр партиягә ветеринария-озату документлары рәсмиләштерелергә, хайваннар «Хорриот» системасында теркәлгән һәм колакларына бирка салынган булырга тиеш. Малларны керткәннән соң, район яки шәһәр ветеринария хезмәтенә хәбәр итү мәҗбүри.
«Суюга карантин чараларын узган саламәт хайваннар гына кертелә. Безнең белгечләр хайваннарны рөхсәтсез кертү очраклары булмасын өчен көн саен контрольдә тота», — дип билгеләп үтте Мотыгуллин.