Карт бабам Якуб Ибраһимов сугыш елларында атлар караган

Малышев исемендәге Столбище урта мәктәбе кадетлары “Камская новь”ның Бөек Ватан сугышына багышланган “Фронт һәм тыл сугыш чоры балалары күзеннән” проектында актив катнашалар. Үз педагоглары Гөлнара Юлдашева җитәкчелегендә балалар без сугыш чоры балалары дип йөрткән өч авылдашлары белән очрашып сөйләшкәннәр. Кадетлар бу теманы үз иншаларында дәвам иттеләр. Сезнең игътибарга 7 “К” сыйныф укучысы Даниэль Демидов иншасын тәкъдим итәбез.

Бөек Ватан сугышы башлангач ирләрне, егетләрне,  хатын-кызларны, кызларны сугышка алалар. Хәтта балалар да сугыша. Әйе, малайлар һәм кызлар өлкәннәр белән бертигез сугышалар. Кызыл армиядә 16 яшьтән кечкенә 3500дән артык фронтовик хезмәт иткән. Аларны “полк уллары” дип атаганнар. Малайлар немецларның азык-төлек, техника, кием-салым складларын яндырганнар, тимер юл вагоннарын һәм паровозларны шартлатканнар. Балалар чираттагы сугыштан соң калган винтовкаларны, патроннар, гранаталарны җыйганнар, ә аннан соң аларның барысын партизаннарга биргәннәр. Әлбәттә, алар үзләрен куркыныч астына куйганнар. Шулай ук балалар яралы солдатларга ярдәм иткәннәр: госпитальләрдә аларның туганнарына һәм якыннарына сугышчылар әйткән хатларны язганнар. Өстәвенә, балалар заводларда һәм фабрикаларда тәүлекләр буе эшләгәннәр, арыганнар, ач булганнар һәм иртә олыгайганнар.

Минем карт бабам Якуб Исхак улы Ибраһимовка хәзер 92 яшь. Бөек Ватан сугышы башланганда аңа 12 яшь, ә аның апасы Фатыйма Исхак кызына 19 да булмый әле. Аларның авылындагы барлык ирләр сугышка китә, балалар, хатын-кызлар һәм карт-коры гына кала. Фатыймага атлар үстереп, аларны фронтка озаткан колхозның рәисе булырга туры килә. Эш авыр һәм җаваплы була. Карт бабам апасына хәрби генерал килүен, фронтка ярдәм итүе өчен рәхмәт белдерүен искә алды. Карт бабам күп яшьтәшләре кебек үк колхозда эшли, атлар һәм колыннарны ашатырга һәм карарга булыша, басуда эшли, өй эшләрен башкара. Иртәдән кичкә кадәр ару-талуны белми эшлиләр.

Сугыш елларында балаларга кыенга туры килә, һәм без аларның батырлыгын беркайчан онытмабыз.