Казанның Совет районы мировой судьялары участоклары 2,5 тапкырга зурайды

Хәзер суд участокларының мәйданы 479,6 кв. метр тәшкил итә — бу элеккеге күрсәткечләрдән 2,5 тапкырга күбрәк. Бу эш өчен уңайлы шартлар тудырырга, эш урыннары җитмәү проблемасын чишәргә һәм суд процессларының нәтиҗәлелеген арттырырга мөмкинлек бирде.
Татарстан юстиция министры урынбасары Марат Низамиев хәбәр иткәнчә, бинаны ремонтлау 4 миллион сумга төшкән. Керү төркеме, баскыч, сак-янгын сигнализациясе һәм конвой бүлмәсе яңартылган. Шулай ук янгынга каршы ишекләр куелган һәм сәламәтлек мөмкинлекләре чикле кешеләр өчен тиешле шартлар тудырылган.
Юстиция министры Рөстәм Заһидуллин яңа бинаны карап чыккач, хезмәт шартларының сизелерлек яхшыруын билгеләп үтте. Моңа кадәр участокларда киңлек җитми иде, конвой бүлмәләре, киңәшмә бүлмәләре һәм архивлар булмаган.
— Мировой судьяларны һәм хезмәткәрләрне яңа йортка күчүләре белән котлыйм. Гадел хөкем өчен заманча инфраструктура булдыру — мөһим бурыч. Лаеклы хезмәт шартлары — бу хезмәткәрләр турында кайгырту һәм гражданнарга хөрмәт күрсәтү ул, — диде Заһидуллин.
Мировой судьялар яңа шартлар өчен рәхмәт белдерделәр. Алар яңа бинаның иркенрәк булуын һәм барлык кирәкле җиһазлар белән тәэмин ителүен билгеләп үттеләр.