Лаеш язучылары һәм шагыйрьләре «Геройлар янәшәдә» патриотик конкурсына гариза бирә ала

Бәйгедә катнашу өчен 2022 елдан соң язылган һәм элек башка бәйгеләрдә катнашмаган әсәрләр кабул ителә.Әсәрләр махсус хәрби операция барышында Татарстан егетләренең күрсәткән каһарманлыгын, фидакарьлеген һәм батырлыгын чагылдырырга тиеш.
Эшләр 2026 елның 1 августына кадәр рус һәм татар телләрендә түбәндәге номинацияләр буенча кабул ителә: «Повесть», «Хикәя», «Поэма яки шигырьләр циклы», «Очерк». Быел беренче тапкыр рус һәм татар телләрендә «Роман» номинациясе булдырылды. Әлеге номинация буенча эшләрне кабул итү 2026 елның 15 октябренә кадәр дәвам итәчәк.
Конкурста җиңүчеләр 2026 елның 9 декабрендә бүләкләү тантанасында игълан ителәчәк. «Повесть», «Хикәя», «Поэма яки шигырьләр циклы» һәм «Очерк» номинацияләрендә җиңүчеләрнең әсәрләре 2026 елда социаль әһәмияткә ия әдәбият исемлеге кысаларында басылып чыгачак, «Роман» номинациясендә җиңүчеләрнеке — 2027 елда. 2026 елда конкурсның гомуми приз фонды 6 640 000 сум тәшкил итәчәк.
Гаризаларны konkurs@tatkniga.ru электрон почтасына «Открытый литературный конкурс патриотической направленности «Геройлар янәшә» — «Герои рядом» дигән билге белән җибәрергә кирәк. Белешмәләр өчен телефон: 8 (843) 519-45-39. Конкурс турындагы нигезләмә һәм катнашучы анкетасы «ТАТМЕДИА» матбугат һәм массакүләм коммуникацияләр буенча республика агентлыгы сайтында урнаштырылган.
Белешмә өчен: Беренче «Геройлар янәшә» — «Герои рядом» патриотик юнәлешле ачык әдәби конкурсы 2024 елның 12 ноябрендә башланды һәм 2025 елның 20 июненә кадәр дәвам итте. Ул язучылар берлегенең бу темага зур кызыксынуын күрсәтте.
Конкурска барлыгы 136 эш килде, шуларның 95е конкурс комиссиясе каравына кабул ителде. Эшләр рус һәм татар телләрендә биш номинациядә кабул ителде: «Повесть», «Хикәя», «Поэма яки шигырьләр циклы», «Очерк», «Әдәбият аша Татарстан Республикасында ватанпәрвәрлек тәрбиясенә өлеш кертү».
Беренче конкурс җиңүчеләрен бүләкләү 2025 елның 20 июнендә ТР Милли китапханәсендә узды. Конкурс нәтиҗәләре буенча җиңүчеләрнең әсәрләре Татарстан китап нәшрияты тарафыннан махсус серия булып — барлыгы 6 җыентык — басылып чыкты.
Конкурс белән беррәттән, махсус «Язучылар мәктәбе» белем бирү проекты эшләячәк. Аның максаты — яшь патриотик авторлар белән эшләү: танылган әдипләрнең лекцияләре һәм мастер-класслары аша талантларны табу, үстерү һәм конкурс эшләре язу процессында аларга һөнәри ярдәм күрсәтү.