«Россия — минем офыкларым» һөнәри юнәлеш бирү дәресләре кысаларында Хәерби мәктәбенең 6 «а» сыйныфы укучылары җирле ФАПта булдылар.
Балалар мондый пунктларның авыл халкына беренчел медицина-санитария ярдәме күрсәтү өчен оештырылуын белделәр. Алар барлык кирәкле медицина җиһазлары белән җиһазландырыла, ә медицина хезмәтләрен квалификацияле хезмәткәрләр күрсәтә.
Укучыларны фельдшер Гүзәл Юнысова каршы алды. Гүзәл Исхак кызы балалар өчен ФАП бинасы буйлап укыту-мәгълүмат бирү экскурсиясе үткәрде, укучыларга табиблар кабул итү кабинетларын күрсәтте, медицина җиһазлары белән эшләүнең үзенчәлекләре турында сөйләде.
Экскурсиядән укучылар канәгать калдылар. Кайберләре, үскәч, медицина хезмәткәрләре булырга теләк белдерделәр.
Фото: Хәерби мәктәбе
Нет комментариев