Лаеш районы башлыгы медицина хезмәткәрләрен медицина көне белән котлады

Бәйрәм атмосферасына карамастан, табиблар эш урынында булуларын дәвам итәләр, теләсә кайсы вакытта мохтаҗларга ярдәм итәргә әзер. Шуңа күрә тантананы үзәк район хастаханәсе территориясендә үткәрәләр. 

— Бүген — илдә иң әһәмиятле һәм хөрмәтле бәйрәмнәрнең берсе, — дип мөрәҗәгать итте Илдус Фатыйхович медицина хезмәткәрләренә. — Сездә һәрвакыт тыгыз график һәм бик катлаулы, җаваплы эш. Сезнең мөһим, җаваплы хезмәтегез өчен рәхмәт белдерәсем килә. Пациентларның тормышы һәм сәламәтлеге сезнең карарыгызга бәйле. Сезнең һөнәрегездә яхшы белем генә түгел, ә игелеклелек, кешеләргә карата кешелекле булу да мөһим.

Район башлыгы районда һәм республикада хастаханәләрне заманча медицина җиһазлары белән тәэмин итүгә зур игътибар бирелүен сөйләде. Ул искә төшергәнчә, күптән түгел Лаеш үзәк район хастаханәсендә ТР сәламәтлек саклау министры Марсель Миңнуллин булып киткән. Медицина хезмәткәрләре белән очрашудан соң Марсель Мансурович монда булган барлык яхшы башлангычларны дәвам итәргә кирәклеген әйтте.

— Медицинада очраклы кешеләр юк, — дип тәмамлады Илдус Зарипов, үзенең котлавын. — Монда басып торучы кешеләр аңлы рәвештә шундый һөнәр сайлаганнар. Сезгә нык сәламәтлек һәм эшегез өчен рәхмәт белдерәм.
Лаеш үзәк район хастаханәсенең баш табибы Елена Коробова район җитәкчелеге тарафыннан медицинаны үстерүгә зур игътибар бирелүен искәртте. Әйтик, быел компьютер томографиясе өчен бина ремонтланды. Хезмәттәшләренә мөрәҗәгать итеп, ул аларга пациентларга күп көч һәм вакыт биргәннәре өчен рәхмәт белдерде. Шулай ук ул коллективның уртак эше алга таба да дәвам итәр дип өметләнә.

Илдус Фатыйх улы ТР сәламәтлек саклау министрлыгының һәм Лаеш районы башлыгының мактау грамоталарын, рәхмәт хатларын сәламәтлек саклау системасының иң яхшы хезмәткәрләренә — табибларга, шәфкать туташларына, провизорларга, кастеляншларга тапшырды. Чара Елена Шәйхаттарова һәм Фидаил Вәлиуллинның музыкаль котлавы белән дәвам итте.